(វ៉ាស៊ីនតោន)៖​ ប្រធានាធិបតីអាមេរិក លោក ដូណាល់ ត្រាំ នៅថ្ងៃអង្គារ ទី១៩ ខែសីហា បានច្រាលចោលលទ្ធភាពបញ្ជូនកងទ័ពអាមេរិកទៅកាន់អ៊ុយក្រែន ប៉ុន្តែបាននិយាយថាសហរដ្ឋអាមេរិកអាចនឹងផ្ដល់ការគាំទ្រតាមផ្លូវអាកាសជាផ្នែកមួយនៃកិច្ចព្រមព្រៀងមួយដើម្បីបិទបញ្ចប់សង្រ្គាមរបស់រុស្ស៉ី។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

មួយថ្ងៃបន្ទាប់ពីលោក ត្រាំ បានសន្យាផ្ដល់ការធានាសន្តិសុខសំដៅជួយបញ្ចប់សង្រ្គាមនៅអ៊ុយក្រែននៅឯកិច្ចប្រជុំកំពូលពិសេសមួយជាមួយ ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី និងក្រុមមេដឹកនាំអឺរ៉ុបនៅឯសេតវិមាន ជំហានឆ្ពោះទៅរកសន្តិភាពនៅតែបន្តស្ថិតក្នុងភាពស្រពេចស្រពិល ខណៈអាមេរិក និងសម្ព័ន្ធមិត្តក្នុងតំបន់អឺរ៉ុបកំពុងពិចារណាថាតើពួកគេគួរតែផ្ដល់ការគាំទ្រផ្នែកយោធាសម្រាប់អ៊ុយក្រែនយ៉ាងដូចម្ដេច?

នៅក្នុងបទសម្ភាសន៍ជាមួយទូរទស្សន៍ Fox News លោក ត្រាំ បានគូសបញ្ជាក់ដូច្នេះថា «នៅពេលនិយាយដល់សន្តិសុខ អឺរ៉ុបចង់ដាក់ពង្រាយកងទ័ព។ យើងនឹង គាំទ្រពួកគេតាមមធ្យោបាយមួយចំនួន ជាពិសេសគឺតាមផ្លូវអាកាស»។ លោក ត្រាំ មិនបានបញ្ជាក់អ្វីលម្អិតបន្ថែមនោះទេ។

គួរបញ្ជាក់ថា អ្នកនាំពាក្យសេតវិមាន លោកស្រី Karoline Leavitt ក៏បានទទួលស្គាល់ដែរថាការគាំទ្រតាមផ្លូវអាកាសរបស់សហរដ្ឋអាមេរិកគឺជាជម្រើសមួយ និងអាចទៅរួច ប៉ុន្តែដូចលោក ត្រាំដែរ លោកស្រីមិនបានផ្ដល់ព័ត៌មានលម្អិតណាមួយឡើយ។ បន្ទាប់ពីកិច្ចប្រជុំកាលពីថ្ងៃចន្ទ រុស្ស៉ីបានបើកការវាយប្រហារតាម ផ្លូវអាកាសទ្រង់ទ្រាយធំលើអ៊ុយក្រែនដោយប្រើប្រាស់ដ្រូន ២៧០គ្រឿង និងមីស៊ីល ១០គ្រាប់៕