(សេអ៊ូល)៖ ប្អូនស្រីបង្កើតរបស់មេដឹកនាំកូរ៉េខាងជើង លោក គីម ជុងអ៊ុន គឺលោកស្រី គីម យ៉ូជុង បាននិយាយថាកូរ៉េខាងត្បូង និងប្រធានាធិបតី លោក Lee Jae Myung កំពុងដើរតួជាមនុស្សមុខ២ ដោយម្ខាងនិយាយថាចង់បានសន្តិភាព ខណៈនៅតែបន្តធ្វើសមយុទ្ធយោធារួមគ្នាជាមួយសហរដ្ឋអាមេរិក។ នេះបើតាមប្រព័ន្ធផ្សព្វផ្សាយរដ្ឋកូរ៉េខាងជើង ដកស្រង់ចេញផ្សាយដោយទីភ្នាក់ងារសារព័ត៌មាន Reuters។

កូរ៉េខាងត្បូង និងសម្ព័ន្ធមិត្តរបស់ខ្លួន សហរដ្ឋអាមេរិកបានចាប់ផ្ដើមធ្វើសមយុទ្ធយោធារួមគ្នានៅក្នុងសប្ដាហ៍នេះ ក្នុងនោះរួមមានការធ្វើតេស្ដលើសមត្ថភាពឆ្លើយតបដែល ត្រូវបានធ្វើបច្ចុប្បន្នភាព ទៅនឹងការគំរាមកំហែងនុយក្លេអ៊ែរពីកូរ៉េខាងជើង។ ទីក្រុងព្យុងយ៉ាងជារឿយៗតែងតែថ្កោលទោសការធ្វើសមយុទ្ធយោធារួមគ្នារវាងអាមេរិក និងកូរ៉េខាងត្បូងថាជាការត្រៀមលក្ខណៈឈ្លានពាន ហើយធ្វើតេស្ដបាញ់មីស៊ីលជាការឆ្លើយតប។ សហរដ្ឋអាមេរិក និងកូរ៉េខាងត្បូងអះអាងសមយុទ្ធយោធារបស់ពួកគេ គឺមានធម្មជាតិការពារខ្លួនសុទ្ធសាធ។

ចាប់តាំងពីឡើងកាន់តំណែងជាប្រធានាធិបតីកូរ៉េខាងត្បូងកាលពីខែមិថុនាមក រដ្ឋាភិបាលរបស់លោក Lee Jae Myung បានស្វះស្វែងទំនាក់ទំនងជាមួយកូរ៉េខាងជើង ក្នុងគោលបំណងស្ដារទំនាក់ទំនងរវាងកូរ៉េទាំង២ឡើងវិញ។ លោក Lee ក្នុងសប្ដាហ៍នេះបានចេញបញ្ជាឱ្យគណៈរដ្ឋមន្ត្រីរបស់លោកត្រៀមខ្លួនអនុវត្តតាមកិច្ចព្រមព្រៀង ដែលមានស្រាប់ជាមួយកូរ៉េខាងជើងមួយផ្នែកជាដំណាក់កាលៗ ហើយកូរ៉េខាងត្បូងថែមទាំងចាប់ផ្ដើមដកឧបករណ៍បំពងសំឡេងចេញបណ្ដោយព្រំដែនទៀតផង។

តែទោះជាបែបនេះក្ដី តាមរយៈការចុះផ្សាយដោយប្រព័ន្ធផ្សព្វផ្សាយរដ្ឋកូរ៉េខាងជើង KCNA លោកស្រី គីម យ៉ូជុង បានលើកឡើងថា «លោក Lee Jae Myung និងកូរ៉េខាងត្បូង នៅតែបន្តធ្វើពុតនិយាយពីសន្តិភាព និងការស្ដារទំនាក់ទំនងឡើងវិញ តែធាតុពិតបន្តធ្វើសមយុទ្ធយោធារួមគ្នាជាមួយសហរដ្ឋអាមេរិក ហើយចង់ទម្លាក់ កំហុសលើពួកយើងថាអ្នកជាអ្នករារាំងមិនឱ្យទំនាក់ទំនងអន្តរកូរ៉េមានភាពល្អប្រសើរ»។

គួរបញ្ជាក់ថា ប្រតិកម្មរបស់លោកស្រី គីម កើតមានឡើងតែមួយថ្ងៃប៉ុណ្ណោះ បន្ទាប់ពីមេដឹកនាំកូរ៉េខាងជើង លោក គីម ជុងអ៊ុន បានហៅសមយុទ្ធយោធារួមគ្នារវាងអាមេរិក និងកូរ៉េខាងត្បូងថាជាការបង្ហាញយ៉ាងច្បាស់ពីចេតនាចង់បង្កសង្រ្គាម និងបានចេញបញ្ជាឱ្យយោធារបស់លោកពង្រឹង ក៏ដូចជាពង្រីកឃ្លាំងអាវុធនុយក្លេអ៊ែរ៕