(កៀវ)៖ ប្រធានាធិបតីរុស្ស៉ី លោក វ្ល៉ាឌីមៀ ពូទីន បានស្នើឱ្យរៀបចំកិច្ចប្រជុំកំពូលសន្តិភាពជាមួយប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី នៅក្នុងទីក្រុងមូស្គូ។ នេះបើតាមប្រភពចំនួន៣ ដែលបានដឹងពីកិច្ចសន្ទនាតាមទូរស័ព្ទរវាងប្រធានាធិបតីអាមេរិក លោក ដូណាល់ ត្រាំ និងលោក ពូទីន។

ប្រភពចំនួន៣ខាងលើ បានប្រាប់ទីភ្នាក់ងារសារព័ត៌មាន AFP កាលពីថ្ងៃអង្គារ ទី១៩ ខែសីហា ដូច្នេះថា «លោក ពូទីនបានលើកឡើងពីទីក្រុងមូស្គូ អំឡុងកិច្ចសន្ទនាតាម ទូរស័ព្ទជាមួយលោក ត្រាំ កាលពីថ្ងៃទី១៨ ខែសីហា»។ ប៉ុន្តែ ប្រភពទាំង៣ដដែលបានឱ្យដឹងថាលោក ហ្សេលេនស្គី បានជំទាស់ទៅនឹងការរៀបចំកិច្ចប្រជុំក្នុងទីក្រុងមូស្គូ។ បន្ថែមពីលើនេះ ប្រភពការទូតមួយផ្សេងទៀតក៏បានប្រាប់ AFP ដែរថាក្រុមមេដឹកនាំអឺរ៉ុបបានប្រាប់លោក ត្រាំថាសំណើរបស់លោក ពូទីន មើលទៅមិនមែនជាគំនិតល្អ នោះទេ។

គួរបញ្ជាក់ថា មេដឹកនាំអ៊ុយក្រែន បានលើកឡើងម្ដងហើយម្ដងទៀតកាលពីប៉ុន្មានសប្ដាហ៍ថ្មីៗនេះថាលោកបានត្រៀមលក្ខណៈរួចរាល់ដើម្បីអង្គុយចរចាជាមួយលោក ពូទីន ដើម្បីបិទបញ្ចប់សង្រ្គាមឈ្លានពានរបស់រុស្ស៉ី។ ចំណែក លោក ពូទីន វិញបានប្រាប់លោក ត្រាំ ក្នុងកិច្ចសន្ទនាតាមទូរស័ព្ទកាលពីថ្ងៃទី១៨ ខែសីហាថារូបលោកបើកចំហ ចំពោះគំនិតបើកកិច្ចចរចាដោយផ្ទាល់ជាមួយអ៊ុយក្រែន៕