(ញូវដែលី)៖ ឥណ្ឌា និងចិន បានឯកភាពគ្នាកាលពីថ្ងៃអង្គារ ទី១៩ ខែសីហាថានឹងចាប់ផ្ដើមជើងហោះហើរដោយផ្ទាល់ឡើងវិញ និងជំរុញលំហូរពាណិជ្ជកម្ម រួមទាំងការវិនិយោគ ខណៈប្រទេសជិតខាងទាំង២កំពុងព្យាយាមស្ដារទំនាក់ទំនងដែលរងការខូចខាតដោយសារជម្លោះព្រំដែនកាលពីឆ្នាំ២០២០។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

ឥណ្ឌា និងចិន កំពុងពង្រឹងទំនាក់ទំនងនឹងគ្នាដោយប្រុងប្រយ័ត្ន នៅចំពោះមុខគោលនយោបាយការបរទេសប្រែប្រួលមិនទៀងទាត់របស់ប្រធានាធិបតីអាមេរិក លោក ដូណាល់ ត្រាំ។ ក្រសួងការបរទេសឥណ្ឌា បានឱ្យដឹងថាប្រទេសទាំង២ នឹងចាប់ផ្ដើមជើងហើរដោយផ្ទាល់ឡើងវិញ និងជំរុញទំនាក់ទំនងពាណិជ្ជកម្ម ក៏ដូចជាការវិនយោគ ក្នុងនោះរួមមានទាំងបើកចំហ សាជាថ្មីការធ្វើពាណិជ្ជកម្មនៅតំបន់ព្រំដែន សម្រួលដល់ការចេញទិដ្ឋាការផងដែរ។

គួរបញ្ជាក់ថា ជើងហោះហើរដោយផ្ទាល់រវាងឥណ្ឌា និងចិន ត្រូវបានផ្អាកចាប់តាំងពីមានការផ្ទុះឆ្លងរាលដាលកូវីដ១៩ ក្នុងឆ្នាំ២០២០៕