(តូក្យូ)៖ ទិន្នន័យរដ្ឋាភិបាលបានបង្ហាញថា ការនាំចេញរបស់ជប៉ុនមានការធ្លាក់ចុះ ៣ខែជាប់គ្នា មកដល់ខែកក្កដា ខណៈពន្ធគយអាមេរិកបន្តដាក់សម្ពាធលើក្រុមហ៊ុនផលិត និងការកើនឡើងនូវក្តីបារម្ភអំពីទស្សនវិស័យសេដ្ឋកិច្ចសម្រាប់ជប៉ុន ដែលពឹងផ្អែកលើការនាំចេញ។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃពុធ ទី២០ ខែសីហា ឆ្នាំ ២០២៥។

ការនាំចេញសរុបពីប្រទេសមានសេដ្ឋកិច្ចធំជាងគេលំដាប់ទី ៤របស់ពិភពលោកមួយនេះ បានធ្លាក់ចុះ ២.៦ភាគរយពីមួយឆ្នាំទៅមួយឆ្នាំ នៅក្នុងខែកក្កដា ដោយសារតែបញ្ហាតម្លៃ។ អត្រានេះគឺខ្ពស់ជាងការព្យាករពីមុន ដែលថាអាចធ្លាក់ចុះតែ ២.១ភាគរយប៉ុណ្ណោះ។ ទន្ទឹមនេះការនាំចេញទៅកាន់សហរដ្ឋអាមេរិក ក៏បានធ្លាក់ចុះ ១០.១ភាគរយផងដែរ បើប្រៀប​ធៀប​នឹង​ឆ្នាំ​មុន ខណៈ​ការ​នាំ​ចេញ​ទៅ​​ចិន​​ធ្លាក់​ចុះ ៣.៥ភាគរយ។

គួរបញ្ជាក់ថា សហរដ្ឋអាមេរិកបានដាក់ពន្ធ ២៥ភាគរយលើរថយន្ត និងគ្រឿងបន្លាស់រថយន្តនៅក្នុងខែមេសា ហើយគំរាមយកពន្ធ ២៥ភាគរយលើទំនិញច្រើនមុខទៀតរបស់ជប៉ុន។ បន្ទាប់ពីមានកិច្ចព្រមព្រៀងពាណិជ្ជកម្ម កាលពីថ្ងៃទី២៣ ខែកក្កដា ពន្ធគយនោះត្រូវបានទម្លាក់ពន្ធមកត្រឹម ១៥ភាគរយ ជាថ្នូរនឹងកញ្ចប់វិនិយោគជប៉ុនចំនួន ៥៥០ពាន់លានដុល្លារអាមេរិក។ យ៉ាងនេះក្តី អត្រាពន្ធលើរថយន្តដែលជាវិស័យនាំចេញធំជាងគេរបស់ជប៉ុន នៅតែខ្ពស់ជាងកម្រិតដើមក្នុងអត្រា ២.៥ភាគរយ ជាហេតុនាំឱ្យមានផលវិបាកដល់ក្រុមហ៊ុនផលិតរថយន្តធំៗ និងអ្នកផ្គត់ផ្គង់គ្រឿងបន្លាស់៕