(ញូវដែលី)៖ នៅថ្ងៃពុធ ទី២០ ខែសីហា មន្រ្តីស្ថានទូតរុស្ស៉ីប្រចាំប្រទេសឥណ្ឌា បានឱ្យដឹងថា ប្រធានាធិបតីរុស្ស៉ី លោក វ៉្លាឌីមៀ ពូទីន និងនាយករដ្ឋមន្រ្តីឥណ្ឌា លោក Narendra Modi នឹងជួបគ្នានៅទីក្រុងញូវដែលី មុនដំណាច់ឆ្នាំនេះ ប៉ុន្តែកាលបរិច្ឆេទជាក់លាក់ មិនទាន់ត្រូវបានកំណត់ជាផ្លូវការនៅឡើយទេ។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។

កាលពីប៉ុន្មានសប្តាហ៍មុន ប្រព័ន្ធផ្សព្វផ្សាយក្នុងស្រុករបស់រុស្ស៉ី ក៏បានរាយការណ៍ដែរថា លោក ពូទីន ត្រូវបានរំពឹងថា នឹងទៅបំពេញ​ទស្សនកិច្ចនៅប្រទេសឥណ្ឌា មុនដំណាច់ឆ្នាំ២០២៥នេះ។ កាលពីថ្ងៃចន្ទ ទី១៨ ខែសីហា លោក ពូទីន ទើបតែបានជួបសន្ទនាតាមទូរសព្ទ​ជាមួយលោក Modi។

គួរបញ្ជាក់ថា លើកចុងក្រោយដែលមេដឹកនាំទាំងពីរ បានជួបមុខគ្នាដោយផ្ទាល់ គឺកាលពីខែតុលា ឆ្នាំ២០២៤ អំឡុងព្រឹត្តិការណ៍​កិច្ចប្រជុំកំពូល BRICS នៅទីក្រុង Kazan នៃប្រទេសរុស្ស៉ី៕