(ញូវដេលី)៖ រដ្ឋាភិបាលឥណ្ឌា គ្រោងហាមប្រាមការលេងហ្គេមតាមអនឡាញ ដែលត្រូវដាក់លុយ នៅក្នុងសំណើនៃសេចក្តីព្រាងច្បាប់មួយ កាលពីថ្ងៃអង្គារសប្តាហ៍នេះ ខណៈដែលអាចមានផលប៉ះពាល់ដល់ឧស្សាហកម្ម ដែលបានទាក់ទាញការវិនិយោគបរទេស គិតជាទឹកប្រាក់រាប់ពាន់លានដុល្លារ។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃពុធ ទី២០ ខែសីហា ឆ្នាំ ២០២៥។

ដោយលើកឡើងពីផលប៉ះពាល់ផ្លូវចិត្ត និងហិរញ្ញវត្ថុ បណ្តាលមកពីហ្គេមប្រភេទនេះ បទប្បញ្ញត្តិនៃច្បាប់ហ្គេមអនឡាញឆ្នាំ ២០២៥ បានលើកឡើងថា គ្មាននរណាណាម្នាក់នឹងមកជួយ ផ្តល់ជំនួយ លើកទឹកចិត្ត ឬបណ្ដោយខ្លួនឱ្យពាក់ព័ន្ធ នឹងហ្គេមអនឡាញដាក់លុយ និងសេវាកម្មបែបនេះឡើយ។ សេចក្តីព្រាងច្បាប់ចំនួន ១៣ទំព័រដែល Reuters ទទួលបាន ពិពណ៌នាអំពីហ្គេមអនឡាញដាក់លុយនេះថា អ្នកលេងហ្គេមនេះសង្ឃឹមថាអាចឈ្នះជាលុយ និងវត្ថុមានតម្លៃផ្សេងទៀត។ រដ្ឋាភិបាលឥណ្ឌា ​មាន​ការ​ព្រួយ​បារម្ភ​ជា​យូរ​មក​ ហើយ​អំពី​ហានិភ័យនៃការញៀននឹងហ្គេមបែប​នេះ​។

គួរបញ្ជាក់ថា ការផ្សព្វផ្សាយពីសំណាក់កីឡាករវាយកូនបាល់ល្បីៗរបស់ឥណ្ឌា និងកិច្ចខិតខំប្រឹងប្រែងផ្នែកទីផ្សារផ្សេងទៀត បានបង្កើនការទាក់ទាញ និងចំណាប់អារម្មណ៍របស់វិនិយោគិន ចំពោះកម្មវិធីលេងហ្គេមរកលុយដ៏ពេញនិយម ដែលដំណើរការដោយក្រុមហ៊ុន Dream11 និង Mobile Premier League ជាដើម។ បើតាមក្រុមហ៊ុនវិនិយោគ Lumikai ទីផ្សារហ្គេមបែបនេះនៅឥណ្ឌា នឹងអាចរកចំណូលបាន ៣.៦ពាន់លានដុល្លារនៅឆ្នាំ ២០២៩៕