(BAR DALORI)៖ គិតត្រឹមថ្ងៃអង្គារសប្តាហ៍នេះ ក្រុមសង្រ្គោះ និងអ្នកភូមិកំពុងស្វែងរកអ្នកនៅមានជីវិត ខណៈចំនួនមនុស្សស្លាប់ ដោយសារភ្លៀងធ្លាក់ខ្លាំងជាច្រើនថ្ងៃ និងទឹកជំនន់ភ្លាមៗនៅភាគខាងជើងប៉ាគីស្ថាន កើនឡើងដល់ជិត ៤០០នាក់។ នេះបើយោងតាមការចេញផ្សាយដោយទីភ្នាក់ងារសារព័ត៌មាន AFP នៅថ្ងៃពុធ ទី២០ ខែសីហា ឆ្នាំ ២០២៥។

ទឹកជំនន់ដោយភ្លៀងមូសុង បោកបក់​បំផ្លាញ​ភូមិ​នានា បង្ក​ឱ្យ​មានបំណាក់ដី និង​ធ្វើ​ឱ្យ​មនុស្ស​ជាច្រើន​បាត់​ខ្លួន។ អាជ្ញាធរជាតិគ្រប់គ្រងគ្រោះមហន្តរាយ (NDMA) និយាយថា មនុស្សចំនួន ៣៥៦នាក់បានស្លាប់ក្នុងខេត្ត Khyber Pakhtunkhwa ចាប់តាំងពីល្ងាចថ្ងៃព្រហស្បតិ៍សប្តាហ៍មុន ខណៈមួយចំនួនទៀតបានស្លាប់នៅតំបន់ជិតខាង។ ដំណើរការស្វែងរកអ្នកបាត់ខ្លួនកំពុងបន្ត នៅក្នុងភូមិ Dalori ដែលរងគ្រោះខ្លាំង។ ផ្លូវជាច្រើនត្រូវបានកាត់ផ្តាច់ បង្កភាពស្មុគស្មាញដល់កិច្ចប្រឹងប្រែងជួយសង្រ្គោះ គ្រាដែរការខូចខាតបណ្តាញទូរស័ព្ទ នាំឱ្យដាច់ទំនាក់ទំនងនៅផ្នែកខ្លះនៃខេត្ត។ NDMA ព្យារកណ៍ថាភ្លៀងមូសុងនឹងបន្តរហូតដល់ថ្ងៃសៅរ៍ចុងសប្តាហ៍ ឬអាចដល់ចុងខែនេះ។

គួរបញ្ជាក់ថា ប៉ាគីស្ថាន ជាប្រទេសមួយនៃពិភពលោក ដែលប្រឈមនឹងគ្រោះធម្មជាតិជាញឹកញាប់។ តាំងពីចុងខែមិថុនា មនុស្សច្រើនជាង ៧០០នាក់បានស្លាប់ និងជិត ១ ០០០នាក់របួស នៅក្នុងរដូវកាលភ្លៀងមូសុងប្រចាំឆ្នាំ៕