(ហ្សេរុយសាឡឹម)៖ រដ្ឋមន្ត្រីការពារជាតិអ៉ីស្រាអែលបានអនុម័តផែនការមួយ នៅថ្ងៃពុធ ទី២០ ខែសីហា ដើម្បីបើកប្រតិបត្តិការដណ្តើមគ្រប់គ្រងទីក្រុងហ្កាហ្សា និងបានអនុញ្ញាតឱ្យមានការកេណ្ឌទ័ពបម្រុងប្រមាណ ៦០,០០០នាក់។ នេះបើយោងតាមការចេញផ្សាយ ដោយទីភ្នាក់ងារសារព័ត៌មាន AFP។

ចំណាត់ការនេះត្រូវបានគេមើលឃើញថា ជាការដាក់សម្ពាធបន្ថែមទៀតលើក្រុមហាម៉ាស ខណៈដែលក្រុមអ្នកសម្រុះសម្រួលកំពុងជំរុញឱ្យមានបទឈប់បាញ់។

ការសម្រេចចិត្តរបស់រដ្ឋមន្ត្រីការពារជាតិ លោក Israel Katz បានកើតឡើងស្របពេលដែលក្រុមអ្នកសម្រុះសម្រួលកំពុងរង់ចាំការឆ្លើយតបជាផ្លូវការរបស់អ៉ីស្រាអែលចំពោះសំណើចុងក្រោយ។ ទោះបីជាប្រទេសកាតាបានបង្ហាញសុទិដ្ឋិនិយមខ្លះៗក៏ដោយ មន្ត្រីជាន់ខ្ពស់អ៉ីស្រាអែលម្នាក់បានបញ្ជាក់ថា រដ្ឋាភិបាលនៅតែរក្សាជំហរយ៉ាងម៉ឺងម៉ាត់ ក្នុងការទាមទារឱ្យដោះលែងចំណាប់ខ្មាំងទាំងអស់នៅក្នុងកិច្ចព្រមព្រៀងណាមួយ។

គួរបញ្ជាក់ថា ក្របខ័ណ្ឌដែលក្រុមហាម៉ាសបានយល់ព្រមនោះ គឺស្នើឱ្យមានបទឈប់បាញ់ដំបូងរយៈពេល ៦០ថ្ងៃ ការដោះលែងចំណាប់ខ្មាំងជាដំណាក់កាល ការដោះលែងអ្នកទោសប៉ាឡេស្ទីនមួយចំនួន និងការអនុញ្ញាតឱ្យមានជំនួយចូលទៅក្នុងតំបន់ហ្កាហ្សា៕