(ញូវដេលី)៖ មន្ត្រីស្ថានទូតរុស្ស៊ីប្រចាំទីក្រុងញូវដេលី បាននិយាយនៅថ្ងៃពុធនេះថា រុស្ស៊ីរំពឹងថាខ្លួននឹងបន្តផ្គត់ផ្គង់ប្រេងទៅឱ្យឥណ្ឌា បើទោះបីជាមានការព្រមានពីសហរដ្ឋអាមេរិកក៏ដោយ ហើយទីក្រុងមូស្គូក៏សង្ឃឹមថានឹងមានកិច្ចចរចាត្រីភាគីរវាងខ្លួន ឥណ្ឌា និងចិន ក្នុងពេលឆាប់ៗនេះ។ នេះបើយោងតាមការចេញផ្សាយ ដោយសារព័ត៌មាន Reuters។

ការប្រកាសនេះធ្វើឡើងបន្ទាប់ពីប្រធានាធិបតីអាមេរិក លោក ដូណាល់ ត្រាំ បានដាក់ពន្ធគយបន្ថែម ២៥% លើទំនិញឥណ្ឌា ដែលនឹងចូលជាធរមាននៅថ្ងៃទី២៧ ខែសីហា ដើម្បីជាការដាក់ទណ្ឌកម្មចំពោះការបន្តទិញប្រេងពីរុស្ស៊ី។ ការដំឡើងពន្ធនេះ នាំឱ្យពន្ធសរុបដែលសហរដ្ឋអាមេរិកដាក់លើទំនិញឥណ្ឌាកើនឡើងដល់ ៥០%។

លោក Roman Babushkin ឯកអគ្គរដ្ឋទូតនៃស្ថានទូតរុស្ស៊ី បាននិយាយនៅក្នុងសន្និសីទសារព័ត៌មានមួយថា «ខ្ញុំចង់បញ្ជាក់ថា បើទោះបីជាមានស្ថានភាពនយោបាយបែបនេះក៏ដោយ យើងអាចព្យាករណ៍បានថា កម្រិតនៃការនាំចូលប្រេង (ដោយឥណ្ឌា) នឹងនៅដដែល»។ លោកបានព្យាករណ៍ថា ឥណ្ឌា និងរុស្ស៊ីនឹងរកមធ្យោបាយដើម្បីយកឈ្នះលើពន្ធគយចុងក្រោយរបស់លោក ត្រាំ ដើម្បី «ផលប្រយោជន៍ជាតិ» នៃប្រទេសទាំងពីរ។

ស្របពេលជាមួយគ្នានេះ ស្នងការពាណិជ្ជកម្មរងរុស្ស៊ី លោក Evgeny Griva បាននិយាយថា ការទិញប្រេងពីរុស្ស៊ីគឺ «ចំណេញច្រើន» សម្រាប់ឥណ្ឌា ដែលជាមធ្យមទទួលបានការបញ្ចុះតម្លៃពី ៥ ទៅ ៧%។ លោកបានបន្ថែមថា រុស្ស៊ីមាន «យន្តការពិសេសបំផុត» ដើម្បីបន្តការផ្គត់ផ្គង់ប្រេងទៅឱ្យឥណ្ឌា ហើយឥឡូវនេះរុស្ស៊ីក៏បានចាប់ផ្តើមទទួលយកការទូទាត់ជាប្រាក់រូពីឥណ្ឌាផងដែរ។

គួរបញ្ជាក់ថា ក្រសួងការបរទេសឥណ្ឌាមិនទាន់ធ្វើអត្ថាធិប្បាយភ្លាមៗទេ ប៉ុន្តែកន្លងមកធ្លាប់បានចាត់ទុកការសម្រេចចិត្តរបស់សហរដ្ឋអាមេរិកដែលផ្តោតលើឥណ្ឌាថាជា «រឿងអកុសលបំផុត»។ ការនាំចូលប្រេងរបស់ឥណ្ឌាពីរុស្ស៊ីបានកើនឡើងយ៉ាងគំហុកពី ០.២រុស្ស៊ីរំពឹងថាឥណ្ឌានឹងបន្តទិញប្រេងរបស់ខ្លួន និងជំរុញឱ្យមានកិច្ចចរចាត្រីភាគីជាមួយចិន% មុនសង្គ្រាមអ៊ុយក្រែន ដល់ ៣៥% នៃតម្រូវការនាំចូលសរុបរបស់ខ្លួននាពេលបច្ចុប្បន្ន៕