(មូស្គូ)៖ រដ្ឋមន្ត្រីការបរទេសរុស្ស៊ី លោក Sergei Lavrov បាននិយាយនៅថ្ងៃពុធនេះថា ការពិភាក្សាអំពីការធានាសន្តិសុខសម្រាប់អ៊ុយក្រែន ដោយគ្មានការចូលរួមពីរុស្ស៊ី គឺជា «ផ្លូវទាល់ច្រក» ដែលនឹងគ្មានលទ្ធផលអ្វីទាំងអស់។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Xinhua នៅថ្ងៃទី២០ ខែសីហា។

លោក Lavrov បានប្រាប់អ្នកសារព័ត៌មាននៅទីក្រុងមូស្គូថា «យើងមិនអាចយល់ព្រមបានទេ ដែលពេលនេះមានការស្នើឱ្យដោះស្រាយបញ្ហាសន្តិសុខដោយគ្មានសហព័ន្ធរុស្ស៊ី។ វានឹងមិនដំណើរការឡើយ» ដោយលោកបានសង្កត់ធ្ងន់ថា លោកខាងលិច ជាពិសេសសហរដ្ឋអាមេរិក យល់ច្បាស់ថា «ការពិភាក្សាអំពីការធានាសន្តិសុខរបស់អ៊ុយក្រែនដោយគ្មានរុស្ស៊ី គឺជាផ្លូវទាល់ច្រក»។

ពាក់ព័ន្ធនឹងលទ្ធភាពនៃកិច្ចប្រជុំត្រីភាគី លោក Lavrov បាននិយាយថា រុស្ស៊ីត្រៀមខ្លួនជាស្រេចដើម្បីធ្វើកិច្ចចរចាក្នុងទម្រង់ណាមួយក៏បាន ប៉ុន្តែកិច្ចប្រជុំកម្រិតខ្ពស់ណាមួយ ត្រូវតែត្រូវបានរៀបចំដោយប្រុងប្រយ័ត្ន ដើម្បីកុំឱ្យស្ថានការណ៍បច្ចុប្បន្នកាន់តែអាក្រក់ទៅវិញ។

គួរបញ្ជាក់ថា ការអត្ថាធិប្បាយរបស់លោក Lavrov នេះ ធ្វើឡើងបន្ទាប់ពីប្រធានាធិបតីអាមេរិក លោក ដូណាល់ ត្រាំ បានទទួលស្វាគមន៍ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី និងមេដឹកនាំអឺរ៉ុបនៅសេតវិមានកាលពីថ្ងៃចន្ទ។ ក្រោយជំនួបនោះ លោក ហ្សេលេនស្គី បានលើកឡើងថា ការធានាសន្តិសុខសម្រាប់ទីក្រុងកៀវ អាចនឹងត្រូវបានបញ្ចប់ក្នុងរយៈពេល ១០ថ្ងៃទៀត៕