(ហ្សេរុយសាឡឹម)៖ គម្រោងតាំងទីលំនៅដ៏ចម្រូងចម្រាសមួយរបស់អ៉ីស្រាអែល ដែលនឹងកាត់ផ្តាច់ទឹកដីដែលប៉ាឡេស្ទីនចង់បានសម្រាប់រដ្ឋនាពេលអនាគត បានទទួលការអនុម័តជាចុងក្រោយហើយកាលពីថ្ងៃពុធ។ នេះបើយោងតាមសេចក្តីថ្លែងការណ៍របស់រដ្ឋមន្ត្រីក្រសួងហិរញ្ញវត្ថុអ៉ីស្រាអែល លោក Bezalel Smotrich ដែលបានប្រកាសថា ចំណាត់ការនេះគឺដើម្បី «លុបបំបាត់» គំនិតបង្កើតរដ្ឋប៉ាឡេស្ទីន។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

គម្រោង E1 ដែលនឹងបំបែកតំបន់ West Bank និងកាត់ផ្តាច់វាពីទីក្រុងហ្សេរុយសាឡឹមខាងកើត ត្រូវបានអនុម័តជាចុងក្រោយដោយគណៈកម្មការផែនការរបស់ក្រសួងការពារជាតិ។ រដ្ឋមន្ត្រីស្តាំនិយមជ្រុលរូបនេះ បានបញ្ជាក់នៅក្នុងសេចក្តីថ្លែងការណ៍មួយថា «ជាមួយនឹងគម្រោង E1 នេះ យើងកំពុងសម្រេចនូវអ្វីដែលបានសន្យាអស់ជាច្រើនឆ្នាំ។ រដ្ឋប៉ាឡេស្ទីនកំពុងត្រូវបានលុបចេញពីតុចរចា មិនមែនដោយពាក្យស្លោកទេ តែដោយសកម្មភាពជាក់ស្តែង»។

ជាការឆ្លើយតប ក្រសួងការបរទេសប៉ាឡេស្ទីនបានថ្កោលទោសការប្រកាសនេះ ដោយបញ្ជាក់ថា គម្រោង E1 នឹងធ្វើឱ្យសហគមន៍ប៉ាឡេស្ទីនដាច់ឆ្ងាយពីគ្នា និងបំផ្លាញលទ្ធភាពនៃដំណោះស្រាយរដ្ឋពីរ។ សហគមន៍អន្តរជាតិ រួមទាំងប្រទេសអាល្លឺម៉ង់ បានថ្កោលទោសគម្រោងនេះ ដោយចាត់ទុកថាជាការរំលោភច្បាប់អន្តរជាតិ និងជាឧបសគ្គដល់ដំណោះស្រាយរដ្ឋពីរ។

គួរបញ្ជាក់ថា គម្រោង E1 ដែលមានទីតាំងនៅក្បែរតំបន់ Maale Adumim គ្រោងនឹងសាងសង់លំនៅដ្ឋានថ្មីប្រហែល ៣,៤០០ខ្នង។ គម្រោងនេះធ្លាប់ត្រូវបានបង្កកក្នុងឆ្នាំ២០១២ និង ២០២០ ដោយសារតែការជំទាស់ពីសហរដ្ឋអាមេរិក និងរដ្ឋាភិបាលអឺរ៉ុប។ សហគមន៍អន្តរជាតិភាគច្រើនចាត់ទុកការតាំងទីលំនៅរបស់អ៉ីស្រាអែលនៅក្នុងតំបន់ West Bank ថាខុសច្បាប់ក្រោមច្បាប់អន្តរជាតិ ខណៈអ៉ីស្រាអែលតែងតែបដិសេធដោយលើកឡើងពីទំនាក់ទំនងរបស់វានឹងប្រវត្តិសាស្ត្រ និងសន្តិសុខ៕