(សេអ៊ូល)​៖ មេដឹកនាំកូរ៉េខាងជើង លោក គីម ជុងអ៊ុន បានកោតសរសើរយ៉ាងខ្លាំងដល់កងទ័ពកូរ៉េខាងជើងដែលត្រូវបានបញ្ជូនឱ្យទៅជួយជារុស្ស៉ី នៅក្នុងសង្រ្គាមប្រឆាំង អ៊ុយក្រែន អំឡុងកិច្ចប្រជុំមួយជាមួយក្រុមមេបញ្ជាការ។ នេះបើតាមប្រព័ន្ធផ្សព្វផ្សាយរដ្ឋកូរ៉េខាងជើង ដកស្រង់ចេញផ្សាយដោយទីភ្នាក់ងារសារព័ត៌មាន AFP។

ប្រព័ន្ធផ្សព្វផ្សាយរដ្ឋកូរ៉េខាងជើង KCNA នៅថ្ងៃព្រហស្បតិ៍ ទី២១ ខែសីហា បានឱ្យដឹងថាលោក គីម បានផ្ញើសារលើកទឹកចិត្តដ៏កក់ក្ដៅ ទៅកាន់ក្រុមមន្ត្រី ​និងកងទ័ពកូរ៉េខាងជើង ដែលកំពុងបំពេញបេសកកម្មនៅក្នុងតំបន់ Kursk របស់រុស្ស៉ី ជាទីដែលទីក្រុងព្យុងយ៉ាងត្រូវបានរាយការណ៍ថាបានបញ្ជូនកងទ័ពជាង ១០ ០០០នាក់ ទៅជួយជាកម្លាំងដល់ កងទ័ពរុស្ស៉ីវាយបណ្ដេញកងទ័ពអ៊ុយក្រែន។

លោក គីម បានគូសបញ្ជាក់ដូច្នេះថា «កងទ័ពរបស់យើងគឺជាកងទ័ពវីរបុរស។ កងទ័ពរបស់យើងបច្ចុប្បន្ន កំពុងធ្វើកិច្ចការដែលចាំបាច់ត្រូវតែធ្វើ ហើយត្រូវសម្រេចឱ្យបាន»។

គួរបញ្ជាក់ថា បើតាមកូរ៉េខាងត្បូង កងទ័ពកូរ៉េខាងជើងប្រហែលជា ៦០០នាក់ត្រូវបានសម្លាប់ និងរាប់ពាន់នាក់ផ្សេងទៀតបានរងរបួស នៅក្នុងសង្រ្គាមជួយរុស្ស៉ីប្រឆាំងនឹង អ៊ុយក្រែន៕