(តៃប៉ិ)៖ ទីភ្នាក់ងារសារព័ត៌មានកណ្ដាល (Central News Agency) របស់តៃវ៉ាន់ បានរាយការណ៍នៅថ្ងៃព្រហស្បតិ៍ ទី២១ ខែសីហា ថាគណៈរដ្ឋមន្ត្រីរបស់កោះតៃវ៉ាន់ នឹងស្នើឱ្យ បង្កើនកញ្ចប់ថវិកាយោធាដល់ ៣១.២៧ពាន់លានដុល្លារនៅឆ្នាំ២០២៦ ឬស្មើនឹង៣.៣២ភាគរយនៃផលិតផលក្នុងស្រុកសរុប GDP។ នេះបើតាមការដកស្រង់ចេញផ្សាយដោយ ទីភ្នាក់ងារសារព័ត៌មាន Reuters។

តាម Central News Agency កញ្ចប់ថវិកាខាងលើក្នុងនោះក៏រួមមានផងដែរកញ្ចប់ថវិកាសម្រាប់ឆ្មាំសមុទ្រ អតីតយុទ្ធជន និងគម្រោងពិសេសនានា។ គណៈរដ្ឋមន្ត្រីតៃវ៉ាន់នឹងរៀបចំ សន្និសីទសារព័ត៌មានមួយនៅថ្ងៃព្រហស្បតិ៍នេះ ដើម្បីប្រកាសពីសេចក្ដីលម្អិតនៃកញ្ចប់ថវិកាខាងលើ។

គួរបញ្ជាក់ថា ប្រធានាធិបតីអាមេរិក លោក ដូណាល់ ត្រាំ ធ្លាប់បានទាមទារឱ្យកោះតៃវ៉ាន់បង្កើនការចំណាយលើកញ្ចប់ថវិកាយោធា ៤ដង ឬ ១០ភាគរយនៃ GDP ឯណោះ ជាកញ្ចប់ថវិកាមួយដែលតៃប៉ិនិយាយថាជារឿងមិនអាចទៅរួច៕