(តូក្យូ)៖ កងនាវាទី៧នៃកងទ័ពជើងទឹកអាមេរិកនៅក្នុងប្រទេសជប៉ុន បានឱ្យដឹងថាអគ្គិភ័យឆាបឆេះអស់រយៈពេលជាង១២ម៉ោង នៅលើនាវាចម្បាំងអាមេរិកមួយគ្រឿង ចតនៅឆ្នេរនៃកោះ Okinawa បានបណ្ដោលឱ្យនាវិក២នាក់រងរបួស។ នេះបើតាមការចេញផ្សាយដោយទីភ្នាក់ងារសារព័ត៌មាន AFP។

នៅក្នុងសេចក្ដីថ្លែងការណ៍មួយ កងនាវាទី៧ បាននិយាយថាអគ្គិភ័យលើនាវាចម្បាំង USS New Orleans ដែលមាននាវិក ៣៦០នាក់នៅលើនោះ និងមានសមត្ថភាពដឹកកងទ័ព ៨០០នាក់ បានចាប់ផ្ដើមឆាបឆេះនៅម៉ោង ៤រសៀល កាលពីថ្ងៃពុធ ទី២០ ខែសីហា (ម៉ោងនៅជប៉ុន) ហើយត្រូវបានពន្លត់នៅព្រឹកថ្ងៃព្រហស្បតិ៍ ទី២១ ខែសីហានេះ។ ប៉ុន្តែ បើតាមសេចក្ដីថ្លែងការណ៍ របស់កងឆ្មាំសមុទ្រជប៉ុនដែលបានជួយពន្លត់អគ្គិភ័យនេះដែរនោះ បាននិយាយថារហូតទាល់តែម៉ោង៩ព្រឹកជាងថ្ងៃព្រហស្បតិ៍នេះ ទើបអគ្គិភ័យត្រូវបានពន្លត់ ហើយថាការស៊ើបអង្កេតមួយ កំពុងធ្វើឡើងដើម្បីបញ្ជាក់ថាតើភ្លើងពិតជាត្រូវបានពន្លត់ទាំងស្រុងឬយ៉ាងណា?

គួរបញ្ជាក់ថា បើតាមកងនាវាទី៧ នៃកងទ័ពជើងទឹកអាមេរិក មូលហេតុនៃអគ្គិភ័យឆាបឆេះនៅលើនាវាច​ម្បាំង USS New Orleans កំពុងស្ថិតនៅក្រោមការស៊ើបអង្កេត ខណៈលោក Carl Schuster ជាអតីតកាប់ពីទែនម្នាក់របស់កងទ័ពជើងទឹកអាមេរិក បាននិយាយថាអគ្គិភ័យគឺជារឿងដ៏គ្រោះថ្នាក់មួយនៅលើនាវាចម្បាំងដែលផ្ទុកទៅដោយសារធាតុងាយឆាបឆេះ៕