(វែលីងតោន)៖ នាថ្ងៃព្រហស្បតិ៍ ទី២១ ខែសីហា ប្រទេសនូវែលសេឡង់ បានប្រកាសថា ខ្លួននឹងចំណាយថវិកាជិត ១.៦ពាន់លានដុល្លារអាមេរិក ដើម្បីទិញឧទ្ធម្ភាចគ្រនិងយន្តហោះ យកមកពង្រឹងសមត្ថភាពរបស់កងកម្លាំងការពារជាតិ។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។

រដ្ឋមន្រ្តីការពារជាតិនូវែលសេឡង់ លោកស្រី Judith Collins និងរដ្ឋមន្រ្តីការបរទេសនូវែលសេឡង់ លោក Winston Peters បានប្រកាសអំពីដំណឹងខាងលើនៅទីក្រុងវែលីនតោន ហើយបានបញ្ជាក់ថា ការសម្រេចទិញសម្ភារយោធាទាំងនេះ គឺដោយសារតែ​ការកើនឡើងនៃភាពតានតឹងនៅលើពិភពលោក។

ក្នុងផែនការខាងលើ នូវែលសេឡង់នឹងចំណាយថវិកា១.១៦ពាន់លានដុល្លារ ដើម្បីទិញឧទ្ធម្ភាគចក្រប្រឆាំងនាវាមុជទឹក Sikorsky MH-60R Seahawk ចំនួន៥គ្រឿង ខណៈថវិកាខ្ទង់៤០០លានដុល្លារទៀត នឹងត្រូវចំណាយលើការទិញយន្តហោះ Airbus A321XLR ២គ្រឿង។

គួរបញ្ជាក់ថា វាគឺជាការបោះជំហានគួរឱ្យកត់សម្គាល់មួយ សម្រាប់នូវែលសេឡង់ ដែលប៉ុន្មានឆ្នាំចុងក្រោយនេះ បានផ្តោតតែទៅលើ​បេសកកម្មរក្សាសន្តិភាពនិងមនុស្សធម៌ប៉ុណ្ណោះ ដោយប្រើប្រាស់យន្តហោះ ឧទ្ធម្ភាគចក្រ និងនាវាចាស់ៗ ដែលធ្លាប់ខូចនិងជួបបញ្ហាផ្សេងៗទៀតជាញឹកញាប់ រហូតបង្កភាពរអាក់រអួលជាច្រើនលើក អំឡុងពេលមេដឹកនាំរបស់ខ្លួន ស្ថិតក្នុងដំណើរបំពេញទស្សនកិច្ចនៅក្រៅប្រទេសថែមទៀត៕