(ហ្សាការតា)៖ នាថ្ងៃព្រហស្បតិ៍ ទី២១ ខែសីហា ទីភ្នាក់ងារប្រយុទ្ធប្រឆាំងអំពើពុករលួយនៃប្រទេសឥណ្ឌូណេស៉ី បានប្រកាសឱ្យដឹងពីការចាប់ខ្លួនអនុរដ្ឋមន្រ្តីក្រសួងការងារ ពាក់ព័ន្ធការស៉ើបអង្កេតមួយ ជុំវិញករណីសង្ស័យគំរាមកំហែងយកប្រាក់។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។

អនុរដ្ឋមន្រ្តីខាងលើឈ្មោះ Immanuel Ebenezer ដែលជាសមាជិកនៃគណបក្ស Gerindra របស់ប្រធានាធិបតីឥណ្ឌូណេស៉ី លោក Prabowo Subianto បានក្លាយជាមន្រ្តីដំបូងគេបង្អស់ នៅក្នុងគណៈរដ្ឋមន្រ្តីរបស់លោក Prabowo ដែលត្រូវបានចាប់ខ្លួន ពាក់ព័ន្ធអំពើពុករលួយ។ រដ្ឋាភិបាលរបស់លោក Prabowo ទើបតែបានឡើងកាន់អំណាចកាលពីខែតុលា ឆ្នាំ២០២៤។

បើតាមលោក Fitroh Rohcahyanto អនុប្រធានគណៈកម្មការលុបបំបាត់អំពើពុករលួយឥណ្ឌូណេស៉ី ការចាប់ខ្លួនលោក Immanuel គឺពាក់ព័ន្ធទៅនឹងដំណើរការស៉ើបអង្កេត ជុំវិញការសង្ស័យមានករណីគំរាមកំហែងយកប្រាក់ប្រឆាំងក្រុមហ៊ុនមួយ ទាក់ទងការចេញអាជ្ញាបណ្ណសុវត្ថិភាពពីសំណាក់ក្រសួងការងារ។

គួរបញ្ជាក់ថា កាលពីឆ្នាំ២០២៤ ឥណ្ឌូណេស៉ីស្ថិតនៅចំណាត់ថ្នាក់លេខ៩៩ នៃប្រទេសសរុបចំនួន១៨០ ក្នុងសន្ទស្សន៍ស្តីពីការយល់ឃើញអំពីអំពើពុករលួយ របស់អង្គការតម្លាភាពពិភពលោក ដែលជាអង្គការឃ្លាំមើលអំពើពុករលួយសកល៕