(វ៉ាស៉ីនតោន)៖ កាលពីថ្ងៃពុធ ទី២០ ខែសីហា អនុប្រធានាធិបតីសហរដ្ឋអាមេរិក លោក JD Vance បាននិយាយថា ក្រុមប្រទេសអឺរ៉ុបនឹងចាំបាច់ត្រូវតែជាអ្នកទទួលបន្ទុកធំជាងគេ នៃការធានាសន្តិសុខសម្រាប់អ៊ុយក្រែន។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។

ថ្លែងក្នុងកិច្ចសម្ភាសមួយជាមួយបណ្តាញព័ត៌មានអាមេរិក Fox News លោក Vance បានលើកឡើងដូច្នេះថា «ខ្ញុំមិនយល់ថា ពួកយើងគួរតែជាអ្នកទទួលបន្ទុកលើរឿងនេះឡើយ លោកប្រធានាធិបតី ត្រាំ រំពឹងអឺរ៉ុបដើរតួនាទីនាំមុខក្នុងបញ្ហានេះ។ ទោះបីជា ការធានាសន្តិសុខនឹងលេចឡើងក្នុងទម្រង់បែបណាក៏ដោយ ក្រុមប្រទេសអឺរ៉ុបចាំបាច់នឹងត្រូវតែជា អ្នកទទួលបន្ទុកធំជាងគេ ព្រោះវាជា​ទ្វីបរបស់ពួកគេ ជាសន្តិសុខរបស់ពួកគេ ហើយលោកប្រធានាធិបតី បានបង្ហាញច្បាស់ណាស់កន្លងមក ដូច្នេះហើយពួកនឹងត្រូវតែជាអ្នករ៉ាប់រងធំ​ក្នុងការទទួលបន្ទុកលើរឿងនេះ»។

ប្រធានាធិបតីអាមេរិក លោក ដូណាល់ ត្រាំ កំពុងបន្តជំរុញឱ្យមានកិច្ចព្រមព្រៀងសន្តិភាព ដើម្បីបញ្ចប់សង្រ្គាមឈ្លានពានរបស់រុស្ស៉ី​នៅអ៊ុយក្រែន ដែលបានអូសបន្លាយជាង ៣ឆ្នាំកន្លះមកហើយ។ អាទិភាពមួយសម្រាប់អ៊ុយក្រែន គឺការធានាសន្តិសុខដល់ខ្លួន ប្រឆាំង​ការឈ្លានពានរបស់រុស្ស៉ីនាពេលក្រោយៗទៀត។ ថ្មីៗនេះលោក ត្រាំ​ បានបង្ហើបថា រូបលោកនឹងមិនបញ្ជូនកងទ័ពផ្ទាល់ទៅអ៊ុយក្រែន​ទេ ប៉ុន្តែអាចចូលរួមផ្តល់ការគាំទ្រតាមផ្លូវអាកាស។

គួរបញ្ជាក់ថា កន្លងមកក្រុមប្រទេសអឺរ៉ុប បានបង្កើតក្រុមប្រទេសដែលមានឆន្ទៈ បញ្ជូនកងទ័ពរបស់ពួកគេដើម្បីទៅធានាសន្តិសុខ​របស់អ៊ុយក្រែន។ ខណៈលោក ត្រាំ មានការមិនពេញចិត្តចំពោះការផ្តល់ជំនួយយោធារាប់សិបពាន់លានដុល្លាររបស់អាមេរិកដល់អ៊ុយក្រែន សេតវិមានបាននិយាយថា ទីក្រុងវ៉ាស៉ីនតោននឹងមិនបន្តផ្តល់ជំនួយទទេៗ ដើម្បីជួយគាំទ្រទីក្រុងកៀវទៀតឡើយ។ លោក ត្រាំ មានបំណងចង់ផ្ទេរការទទួលខុសត្រូវនេះ ទៅកាន់ក្រុមសម្ព័ន្ធមិត្តអឺរ៉ុបវិញ៕