(កៀវ)៖ នៅថ្ងៃព្រហស្បតិ៍ ទី២១ ខែសីហា អ៊ុយក្រែនបានឱ្យដឹងថា រុស្ស៉ីបានប្រើប្រាស់យន្តហោះដ្រូននិងមីស៉ីលសរុបរាប់រយ ក្នុងការវាយប្រហារដ៏ធំបំផុតតាមផ្លូវអាកាស គិតចាប់តាំងពីពាក់កណ្តាលខែកក្កដា ជាហេតុនាំឱ្យមនុស្សយ៉ាងហោចម្នាក់ស្លាប់ និងជាច្រើននាក់ផ្សេងទៀតរងរបួស។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

នាយករដ្ឋមន្រ្តីអ៊ុយក្រែន លោកស្រី Yulia Svyrydenko បានបង្ហោះសារលើបណ្តាញសង្គមថា ការវាយប្រហារថ្មីចុងក្រោយនេះ ស្តែងឱ្យឃើញថា រុស្ស៉ីតាមពិតគឺមិនមានភាពប្រាកដប្រជាឡើយ ចំពោះការស្វែងរកកិច្ចព្រមព្រៀងសន្តិភាព បើទោះបីសហរដ្ឋអាមេរិក បានប្រឹងប្រែងធ្វើការទូតយ៉ាងខ្លាំង ក្នុងពេលប៉ុន្មានថ្ងៃមកនេះក៏ដោយ។

បើតាមលោកស្រី Svyrydenko រុស្ស៉ីបានប្រើប្រាស់អាវុធចម្រុះក្នុងការវាយប្រហារដ៏ធំរបស់ខ្លួន គឺរួមមានទាំងដ្រូន មីស៉ីលគ្រូស មីស៉ីលបាលិស្ទីគ និងមីស៉ីលល្បឿនលឿនជាងសំឡេង។ កងទ័ពអាកាសអ៊ុយក្រែន បានអះអាងថា រុស្ស៉ីបានប្រើយន្តហោះដ្រូនចំនួន​៥៧៤គ្រឿង រួមជាមួយមីស៉ីល៤០គ្រាប់ ដោយក្នុងនោះដ្រូន៥៤៦គ្រឿង និងមីស៉ីល៣១គ្រាប់ ត្រូវបានបាញ់ទម្លាក់។ មនុស្សម្នាក់​បានស្លាប់និង២នាក់បានរងរបួស នៅទីក្រុង Lviv ខណៈ១២នាក់ផ្សេងទៀត ក៏បានរងរបួសដែរ នៅទីក្រុង Mukachevo ហើយ​អគារជាច្រើនខ្នងបានរងការខូចខាត។

គួរបញ្ជាក់ថា កាលពីសប្តាហ៍មុន ប្រធានាធិបតីអាមេរិក លោក​ ដូណាល់ ត្រាំ បានជួបប្រធានាធិបតីរុស្ស៉ី លោក វ៉្លាឌីមៀ ពូទីន នៅរដ្ឋ Alaska មុនអញ្ជើញប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី និងក្រុមមេដឹកនាំអឺរ៉ុប ទៅកាន់សេតវិមាន កាលពីដើមសប្តាហ៍នេះ ដើម្បីបើកកិច្ចពិភាក្សាដាច់ដោយឡែក។

រុស្ស៉ីបាននិយាយបន្ទាបលទ្ធភាព កើតមានកិច្ចប្រជុំកំពូលទ្វេភាគីឆាប់ៗ រវាងលោក ពូទីន និងលោក ហ្សេលេនស្គី ហើយបាន​លើកឡើងថា ខ្លួនចង់ត្រូវរាប់បញ្ចូលក្នុងកិច្ចពិភាក្សា ស្តីពីការធានាសន្តិសុខនាពេលអនាគតសម្រាប់អ៊ុយក្រែន៕