(មីនស្កិ៍, តេហេរ៉ង់)៖ បេឡារុស និងអ៉ីរ៉ង់ គ្រោងធ្វើឱ្យទំនាក់ទំនងទ្វេភាគីកាន់តែស៉ីជម្រៅលើគ្រប់វិស័យ រួមទាំងការពារជាតិ ខណៈប្រធានាធិបតីប្រទេសទាំងពីរ បានជួបពិភាក្សាគ្នានៅក្នុងទីក្រុង Minsk។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃព្រហស្បតិ៍ ទី២១ ខែសីហា ឆ្នាំ ២០២៥។

ប្រព័ន្ធផ្សព្វផ្សាយរដ្ឋ Belta របស់បេឡារុស បានដកស្រង់សម្តីលោក Alexander Lukashenko ដែលគូសបញ្ជាក់ថា «ក្នុងលក្ខខណ្ឌនៃភាពចលាចលភូមិសាស្ត្រនយោបាយ ទីក្រុង Minsk និងទីក្រុង Tehran កំពុងអនុវត្តជំហានស្របគ្នា និងមានតុល្យភាព ហើយខិតខំប្រឹងប្រែងដើម្បីប្រែក្លាយបញ្ហាប្រឈមទៅជាឱកាស» ដោយបន្ថែមថា ប្រទេសទាំងពីរអាចចាប់ដៃគូលើវិស័យជាច្រើន រួមទាំងកិច្ចសហប្រតិបត្តិការបច្ចេកទេសយោធា។

ដោយលើកឡើងអំពីទណ្ឌកម្មរបស់លោកខាងលិច លោក Masoud Pezeshkian ថា «អ៉ីរ៉ង់ ត្រៀមខ្លួនជាស្រេចដើម្បីជួយបេឡារុស» ជាមួយនិងការកត់សម្គាល់ថា ខ្លួនមានបទពិសោធន៍ជាង ៤០ឆ្នាំចំពោះបញ្ហានេះ ហើយថាប្រទេសទាំងពីរចាំបាច់ត្រូវកសាងទំនាក់ទំនងសេដ្ឋកិច្ច និងទំនាក់ទំនងផ្សេងទៀតឱ្យដល់ចំណុចមួយ ដែលត្រូវនឹងកម្រិតខ្ពស់នៃទំនុកចិត្តរវាងពួកគេ។

គួរបញ្ជាក់ថា បេឡារុស និងអ៉ីរ៉ង់ គឺជាសម្ព័ន្ធរបស់រុស្ស៉ីដែលគាំទ្រសង្រ្គាមនៅអ៊ុយក្រែន។ អ៉ីរ៉ង់បានផ្គត់ផ្គង់ដ្រូនដល់រុស្ស៉ី ខណៈលោក Pezeshkian បានចុះកិច្ចព្រមព្រៀងសហប្រតិបត្តិការយុទ្ធសាស្ត្រជាមួយ លោក ពូទីន កាលពីខែមករា៕