(SANTIAGO)៖ ក្រុមអ្នកវិទ្យាសាស្ត្រព្រមានថា ការកើនឡើងនូវអ្នកទេសចរ និងការពង្រីកគម្រោងស្រាវជ្រាវនានា កំពុងរួមចំណែកបំពុលទ្វីបអង់តាក់ទិក ហើយជាផលប៉ះពាល់ថ្មីទៀត ចំពោះទីឋានដ៏ស្រស់ថ្លាបំផុតមួយរបស់ផែនដី និងដែលបានរងការគំរាមកំហែងពីកត្តាប្រែប្រួលអាកាសធាតុ បង្កឡើងដោយមនុស្សស្រាប់ទៅហើយ។ នេះបើយោងតាមការចេញផ្សាយដោយទីភ្នាក់ងារសារព័ត៌មាន AFP នៅថ្ងៃព្រហស្បតិ៍ ទី២១ ខែសីហា ឆ្នាំ ២០២៥។

ក្រុមអ្នកស្រាវជ្រាវអន្តរជាតិ បានលើកឡើងក្នុងការសិក្សាថ្មីមួយថា នៅអង់តាក់ទិក កន្លែងដែលមានមនុស្សធ្វើសកម្មភាព កំហាប់ភាគល្អិតមានកម្រាស់ក្រាស់ជាង ៤០ឆ្នាំមុនរហូតដល់ ១០ដង។ ការប្រែប្រួលនេះកើតមានឡើង នៅពេលដែលចំនួនអ្នកទេសចរនៅកាន់តំបន់នោះ បានកើនឡើងពីចំនួន ២០ ០០០នាក់ទៅ ១២០ ០០០នាក់ ក្នុងរយៈពេល ២ទសវត្សរ៍ចុងក្រោយ។ វត្តមានមនុស្សកាន់ច្រើននៅទ្វីបអង់តាក់ទិក បង្កើនក្តីបារម្ភអំពីការបញ្ចេញសមាសធាតុពុលពីឥន្ធនៈហ្វូស៉ីល ដែលរួមមានទាំងនាវា យន្តហោះ យានជំនិះ និងមធ្យោបាយផ្សេងទៀត។ នាវាដឹកអ្នកទេសចរគឺផ្ទុកទៅដោយឥន្ធនៈហ្វូស៉ីលកខ្វក់។

អ្នកវិទ្យាសាស្រ្តម្នាក់និយាយថា ទេសចរម្នាក់ អាចរួមចំណែកពន្លឿនការរលាយព្រិលប្រហែល ១០០តោន។ អ្នកស្រាវជ្រាវមកពីប្រទេសជាច្រើន បានចំណាយពេល ៤ឆ្នាំក្នុងការធ្វើដំណើរចម្ងាយ ២ ០០០គីឡូម៉ែត្រទៅទ្វីបអង់តាក់ទិក ដើម្បីវាស់ស្ទង់កម្រិតកខ្វក់។ វត្តមាន​នៃ​លោហធាតុ​ទម្ងន់ធ្ងន់ៗ ​ក៏​មាន​ការ​កើន​ឡើង​ផង​ដែរ​ ដោយ​សារ​ការ​ធ្វើ​ដំណើរ​តាម​បែប​វិទ្យាសាស្ត្រ។ សម្រាប់គម្រោងស្រាវជ្រាវដែលត្រូវប្រើពេលស្នាក់នៅយូរ អាចមានផលប៉ះពាល់ដល់ច្រើនជាង ១០ ដង ធៀបនឹងទេសចរម្នាក់៕