(ហ្សឺណែវ)៖ ប្រធានទីភ្នាក់ងារជនភៀសខ្លួនប៉ាឡេស្ទីនរបស់អង្គការសហប្រជាជាតិ (UNRWA) បានសម្តែងការព្រួយបារម្ភយ៉ាងខ្លាំង នៅ ថ្ងៃព្រហស្បតិ៍ថា កុមារដែលកំពុងរងគ្រោះដោយសារកង្វះអាហារូបត្ថម្ភនៅតំបន់ហ្កាហ្សា នឹងត្រូវស្លាប់ ប្រសិនបើមិនមានការផ្តល់ជំនួយសង្គ្រោះបន្ទាន់ជាបន្ទាន់ទេ ក្នុងអំឡុងពេលប្រតិបត្តិការយោធារបស់អ៉ីស្រាអែលនៅទីក្រុងហ្កាហ្សា។ នេះបើយោងតាមការចេញផ្សាយ ដោយទីភ្នាក់ងារសារព័ត៌មាន Reuters។

អគ្គស្នងការ UNRWA លោក Philippe Lazzarini បានឱ្យដឹងថា ទិន្នន័យរបស់ទីភ្នាក់ងារបានបង្ហាញពីការកើនឡើង ៦ដងនៃចំនួនកុមារដែលរងគ្រោះដោយសារកង្វះអាហារូបត្ថម្ភនៅទីក្រុងហ្កាហ្សា ចាប់តាំងពីខែមីនាមក។ លោកបានមានប្រសាសន៍ថា «យើងមានប្រជាជនមួយដែលខ្សោយខ្លាំងបំផុត ដែលនឹងត្រូវប្រឈមមុខនឹងប្រតិបត្តិការយោធាដ៏ធំមួយទៀត។ ពួកគេជាច្រើននាក់នឹងមិនមានកម្លាំងគ្រប់គ្រាន់ដើម្បីឆ្លងកាត់ការផ្លាស់ទីលំនៅថ្មីមួយទៀតបានទេ»។

ថ្លែងនៅក្នុងសន្និសីទសារព័ត៌មានមួយនៅទីក្រុងហ្សឺណែវ លោក Lazzarini បានព្រមានយ៉ាងច្បាស់អំពីជោគវាសនារបស់កុមារទាំងនោះថា «ពួកគេជាច្រើននាក់នឹងមិនអាចរស់រានមានជីវិតបានឡើយ។ នេះគឺជាគ្រោះអត់ឃ្លានដែលត្រូវបានបង្កើតឡើងដោយចេតនា។ វាគឺជាចេតនា។ អាហារត្រូវបានប្រើប្រាស់ជាឧបករណ៍នៃសង្គ្រាម»។

គួរបញ្ជាក់ថា ទីភ្នាក់ងារយោធាអ៉ីស្រាអែលដែលសម្របសម្រួលជំនួយ (COGAT) កន្លងមកធ្លាប់បានបដិសេធការចោទប្រកាន់នេះ ដោយបញ្ជាក់ថា ខ្លួនបានខិតខំប្រឹងប្រែងយ៉ាងខ្លាំងដើម្បីធានាថាជំនួយបានទៅដល់តំបន់ហ្កាហ្សា និងបានបដិសេធថាមិនបានរឹតបន្តឹងការផ្គត់ផ្គង់ឡើយ៕