(បាងកក)៖ ក្រុមបះបោរទាមទារផ្តាច់ខ្លួន បានបើកការវាយប្រហារអត្តឃាតដោយរថយន្តផ្ទុកគ្រឿងផ្ទុះ បំបុកប៉ុស្តិ៍ត្រួតពិនិត្យមួយកន្លែងនៅខេត្ត Narathiwat ភាគខាងត្បូងប្រទេសថៃកាលពីយប់ថ្ងៃពុធ បណ្តាលឱ្យមន្ត្រីយ៉ាងហោចណាស់ ៤នាក់រងរបួស។ នេះបើយោងតាមការចេញផ្សាយ ដោយសារព័ត៌មានក្នុងស្រុកថៃ។

កាមេរ៉ាសុវត្ថិភាពបានបង្ហាញទិដ្ឋភាពរថយន្ត Pick-up មួយគ្រឿងបានបើកបំបុកប៉ុស្តិ៍ត្រួតពិនិត្យមួយដែលស្ថិតក្នុងស្រុក Tak Bai មុននឹងផ្ទុះឡើង បណ្តាលឱ្យមន្ត្រីស្ម័គ្រចិត្ត ៤នាក់រងរបួស និងបង្កការខូចខាតយ៉ាងធ្ងន់ធ្ងរដល់ប៉ុស្តិ៍ត្រួតពិនិត្យ។ អាជ្ញាធរបានបញ្ជាក់ថា ក្រុមជនសង្ស័យបានរត់គេចខ្លួន ខណៈកងកម្លាំងបានបាញ់តបតវិញ។

ជាការឆ្លើយតប មេបញ្ជាការយោធភូមិភាគទី៤ លោក Paisal Nusang បានបញ្ជាឱ្យរឹតបន្តឹងសន្តិសុខទូទាំងតំបន់ និងបិទច្រករត់គេចខ្លួន ជាពិសេសនៅតាមព្រំដែនថៃ-ម៉ាឡេស៊ី។ លោកក៏បានចុះពិនិត្យកន្លែងកើតហេតុដោយផ្ទាល់ និងបានជំរុញឱ្យមន្ត្រីបង្កើនការប្រុងប្រយ័ត្នខ្ពស់បំផុត។

គួរបញ្ជាក់ថា ជម្លោះដ៏រ៉ាំរ៉ៃនៅភាគខាងត្បូងប្រទេសថៃ បានបណ្តាលឱ្យមនុស្សជាង ៧,៦០០នាក់ស្លាប់ចាប់តាំងពីឆ្នាំ២០០៤ មក។ ច្បាប់អាជ្ញាសឹក និងក្រឹត្យគ្រាអាសន្ន ដែលផ្តល់អំណាចពិសេសដល់យោធា នៅតែបន្តមានជាធរមាននៅក្នុងតំបន់នេះ៕