(កៀវ)៖ ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី បាននិយាយថារូបលោកអាចនឹងជួបលោកប្រធានាធិបតីរុស្ស៉ី វ្ល៉ាឌីមៀ ពូទីន ប៉ុន្តែលុះត្រាតែសម្ព័ន្ធមិត្តរបស់លោក យល់ព្រមផ្ដល់ការធានាសន្តិសុខសម្រាប់អ៊ុយក្រែនជាមុនសិន ដើម្បីកំញើញកុំឱ្យរុស្ស៉ីបើកការវាយប្រហារនៅពេលអនាគត ក្នុងករណីសង្រ្គាមសព្វថៃបិទបញ្ចប់។ នេះបើតាមការចេញផ្សាយដោយទីភ្នាក់ងារសារព័ត៌មាន AFP។

នៅក្នុងការអត្ថាធិប្បាយមួយចេញផ្សាយនៅថ្ងៃព្រហស្បតិ៍ ទី២១ ខែសីហា លោក ហ្សេលេនស្គីក៏បានព្រមានដែរថាភាគីទាំងសងខាងកំពុងត្រៀមលក្ខណៈសម្រាប់ការវាយប្រយុទ្ធគ្នា តទៅទៀត។ ដ្បិតបើតាមលោក ហ្សេលេនស្គី រុស្ស៉ីកំពុងប្រមូលផ្តុំកងទ័ពនៅសមរភូមិភាគខាងត្បូងនៃប្រទេសអ៊ុយក្រែន។ លោក ហ្សេលេនស្គី បានគូសបញ្ជាក់ដូច្នេះថា «យើងចង់ បានការឯកភាពលើការផ្ដល់ការធានាសន្តិសុខក្នុងរយៈពេលពី៧ ទៅ១០ថ្ងៃខាងមុខ ហើយយើងចាំបាច់ចង់ដឹងថាតើប្រទេសណាខ្លះដែលត្រៀមខ្លួនជាស្រេចដើម្បីធ្វើអ្វី»។

គួរបញ្ជាក់ថា លោក ដូណាល់ ត្រាំ បានច្រានចោលលទ្ធភាពបញ្ជូនកងទ័ពអាមេរិកទៅកាន់អ៊ុយក្រែន តែបានអះអាងថានឹងផ្ដល់ការគាំទ្រតាមផ្លូវអាកាសជាផ្នែកមួយ នៃការធានាសន្តិសុខឱ្យអ៊ុយក្រែន។ ចំណែក សម្ព័ន្ធមិត្តមួយក្រុមដឹកនាំដោយចក្រភពអង់គ្លេស និងបារាំង កំពុងបង្កើតក្រុមចម្រុះយោធាមួយក្នុងការផ្ដល់ការគាំទ្រដល់ ការធានាសន្តិសុខ៕