(មូស្គូ)៖ ប្រធានាធិបតីរុស្ស៉ី លោក វ្ល៉ាឌីមៀ ពូទីន បានទាមទារឱ្យអ៊ុយក្រែនបោះបង់ចោលតំបន់ Donbas ព្រមទាំងមហិច្ឆតាចង់ចូល NATO និងមិនត្រូវឱ្យកងទ័ពលោកខាងលិចឈរជើង នៅលើទឹកដីអ៊ុយក្រែននោះទេ ជាលក្ខខណ្ឌឈានទៅរកការបិទបញ្ចប់សង្រ្គាម។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

ដោយផ្អែកលើប្រភពចំនួន៣ ដែលជិតស្និទ្ធនឹងមន្ត្រីជាន់ខ្ពស់នៃវិមានក្រឹមឡាំង Reuters កាលពីថ្ងៃព្រហស្បតិ៍ ទី២១ ខែសីហា បានរាយការណ៍ថានៅក្នុងសំណើថ្មីរបស់លោក ពូទីន រុស្ស៉ី បានទាមទារឱ្យអ៊ុយក្រែនដកកងទ័ពចេញទាំងស្រុងពីផ្នែកមួយចំនួននៃតំបន់ Donbas ដែលខ្លួនកំពុងគ្រប់គ្រង។ ជាថ្នូរត្រឡប់ទៅវិញ ទីក្រុងមូស្គូនឹងបញ្ឈប់សង្រ្គាមត្រឹមសមរភូមិបច្ចុប្បន្ន ក្នុងតំបន់ Zaporizhzhia និង Kherson។ រុស្ស៉ីកំពុងគ្រប់គ្រង៨៨ភាគរយនៃតំបន់ Donbas និង៧៣ភាគរយនៃតំបន់ Zaporizhzhia និង Kherson។ នេះបើតាមការវាយតម្លៃរបស់ សហរដ្ឋអាមេរិក។

ប្រភពដដែលបានប្រាប់ Reuters ទៀតថាទីក្រុងមូស្គូក៏មានបំណងបោះបង់ចោលទឹកដីមួយផ្នែកតូចនៃតំបន់ Kharkiv, Sumy និង Dnipropetrovsk ដែលកងទ័ពរុស្ស៉ីកំពុងកាន់កាប់ទៅឱ្យ អ៊ុយក្រែនវិញផងដែរ ជាផ្នែកនៃកិច្ចព្រមព្រៀង។ បន្ថែមលើនេះ លោក ពូទីន នៅតែប្រកាន់ខ្ជាប់យ៉ាងម៉ឺងម៉ាត់នូវសំណើដែលលោកទាមទារកន្លងមក នោះគឺអ៊ុយក្រែនត្រូវបោះបង់ចោល មហិច្ឆតាចង់ចូល NATO ហើយបក្សសម្ព័ន្ធយោធានេះមិនត្រូវពង្រីកឥទ្ធិពលបន្ថែមឆ្ពោះទៅទិសខាងកើត កំណត់ចំនួនកងទ័ពរបស់អ៊ុយក្រែន និងមិនត្រូវឱ្យកងទ័ពលោកខាងលិចឈរជើង នៅលើទឹកដីអ៊ុយក្រែនជាផ្នែកមួយនៃកងកម្លាំងរក្សាសន្តិភាពដាច់ខាត។

ខាងក្រសួងការបរទេសអ៊ុយក្រែន មិនបានធ្វើអត្ថាធិប្បាយអ្វីទេចំពោះសំណើរបស់លោក ពូទីន។ តែលោក ហ្សេលេនស្គី ធ្លាប់បានច្រានចោលម្ដងហើយម្ដងទៀតចំពោះគំនិតចង់ឱ្យអ៊ុយក្រែន បោះបង់ចោលទឹកដីរបស់ខ្លួនដែលអន្តរជាតិទទួលស្គាល់ទៅឱ្យរុស្ស៉ី ជាផ្នែកមួយនៃកិច្ចព្រមព្រៀងសន្តិភាព។ តាមលោក ហ្សេលេនស្គី តំបន់ Donbas បៀបដូចជាលេណដ្ឋានដ៏រឹងមាំមួយ អាចទប់ទល់កុំឱ្យកងទ័ពរុស្ស៉ីវាយចូលទៅជ្រៅក្នុងទឹកដីអ៊ុយក្រែន៕