(គួឡាឡាំពួរ)៖ រដ្ឋាភិបាលម៉ាឡេស៉ី កំពុងជំរុញឱ្យមានកិច្ចសហប្រតិបត្តិការកាន់តែខ្លាំងរវាងរដ្ឋ និងអាជ្ញាធរសហព័ន្ធ ដើម្បីទាញយកប្រាក់ចំណញពីរ៉ែកម្រដ៏សន្ធឹកសន្ធាប់ដែលម៉ាឡេស៉ីមាន ដោយគ្រោងសាងសង់ប្រព័ន្ធអេកូឡូស៉ីរ៉ែកម្រ (Rare earth ecosystem) ដែលរួមបញ្ចូលគ្នារាប់ចាប់តាំងពីការជីក និងការកែច្នៃ រហូតដល់ការផលិតជាមេដែកតែម្តង។ នេះបើយោងតាមការចេញផ្សាយដោយទីភ្នាក់ងារសារព័ត៌មាន CNA នៅថ្ងៃសុក្រ ទី២២ ខែសីហា ឆ្នាំ ២០២៥។

រ៉ែកម្រដែលម៉ាឡេស៉ីមាន ត្រូវបានគេប៉ាន់ប្រមាណថាមានតម្លៃជាង ២០០ពាន់លានដុល្លារ ប៉ុន្តែជួបការលំបាកដោយសារកង្វះខាតផ្នែកបច្ចេកវិទ្យា។ បច្ចុប្បន្ន ប្រទេសអាស៊ានមួយនេះ ផ្គត់ផ្គង់ ១៣ភាគរយនៃតម្រូវការរ៉ែសំខាន់ៗទូទាំងពិភពលោក ហើយក៏​ជាទីនៃរោងចក្រ​កែច្នៃ​រ៉ែ​កម្រ​ធំ​បំផុតមួយផងដែរ ​​ក្រៅ​ពី​ចិន។ តាមគម្រោងក្រុមការងារយុទ្ធសាស្ត្ររបស់រដ្ឋាភិបាល ក្នុងការផលិតមេដែកទំនើបៗ នឹងបង្កើតឱ្យបានប្រាក់ចំណូល ៣ពាន់លានដុល្លារនៅឆ្នាំ ២០៣០។

ក្នុងពេលបង្ហាញផែនការទៅកាន់សភា កាលពីសប្តាហ៍មុន នាយករដ្ឋមន្រ្តីម៉ាឡេស៉ី លោក Anwar Ibrahim បានលើកឡើងពីអាទិភាពនៃការអភិវឌ្ឍរ៉ែកម្រ ដោយបញ្ជាក់ថា «នឹងផ្តោតលើការជំរុញសមត្ថភាពក្នុងស្រុក ជុំវិញបច្ចេកវិទ្យារុករករ៉ែ ការចម្រាញ់ ការបំបែកខ្លួន តាមរយៈកិច្ចសហប្រតិបត្តិការជាយុទ្ធសាស្រ្តជាមួយបរទេស។ ធនធានដែលផលិតបាន នឹងត្រូវផ្តល់សម្រាប់ការប្រើប្រាស់ក្នុងស្រុកជាចម្បង»។

គួរបញ្ជាក់ថា នៅតំបន់ឧស្សាហកម្ម Gebeng នៃទីក្រុង Pahang មានរោងចក្ររ៉ែមួយឈ្មោះ Lynas Advanced Materials Plant នៅលើផ្ទៃដី ១០០ហិចតា ដែលត្រូវបានគ្រប់គ្រងទាំងស្រុង ដោយក្រុមហ៊ុនរុករករ៉ែអូស្ត្រាលី Lynas Rare Earths។ រោងចក្រនេះផលិតបានសមាសធាតុទម្ងន់ ១ ៥០០តោនជារៀងរាល់ឆ្នាំ សម្រាប់បម្រើឱ្យការផលិតមេដែកធន់នឹងកំដៅ ដែលផ្តល់ថាមពលដល់ឧបករណ៍បច្ចេកវិទ្យាខ្ពស់ រាប់ចាប់ពីអាវុធ និងឧបករណ៍វេជ្ជសាស្ត្រ រហូតដល់ទួរប៊ីនខ្យល់ និងរថយន្តអគ្គិសនី៕