(ប៉េកាំង)៖ នាថ្ងៃសុក្រ ទី២២ ខែសីហា ទីក្រុងប៉េកាំងបានប្រកាសថា ប្រធានាធិបតីចិន លោក ស៉ី ជីនពីង នឹងធ្វើជាម្ចាស់ផ្ទះទទួលស្វាគមន៍ ប្រធានាធិបតីរុស្ស៉ី លោក វ៉្លាឌីមៀ ពូទីន អគ្គលេខាធិការអង្គការសហប្រជាជាតិ (UN) លោក Antonio Guterres ព្រមទាំង​ប្រមុខរដ្ឋាភិបាលបរទេសជាង២០រូបផ្សេងទៀត នាចុងខែនេះ ដើម្បីបើកកិច្ចប្រជុំកំពូល SCO។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។

កិច្ចប្រជុំអង្គការសហប្រតិបត្តិការសៀងហៃ ឬហៅកាត់ថា SCO នឹងត្រូវរៀបចំឡើងនៅទីក្រុង Tianjin ពីថ្ងៃទី៣១ ខែសីហា ដល់​ថ្ងៃទី១ ខែកញ្ញា។ ប្រធានាធិបតីអ៉ីរ៉ង់ លោក Masoud Pezeshkian និងនាយករដ្ឋមន្រ្តីឥណ្ឌា លោក Narendra Modi សុទ្ធតែស្ថិតក្នុងចំណោមមេដឹកនាំ ដែលនឹងមានវត្តមានក្នុងកិច្ចប្រជុំកំពូលនេះ។ រីឯនាយករដ្ឋមន្រ្តីម៉ាឡេស៉ី លោក Anwar Ibrahim ក៏បានគ្រោងនឹងចូលរួមផងដែរ មុនធ្វើជាម្ចាស់ផ្ទះទទួលប្រធានាធិបតីអាមេរិក លោក ដូណាល់ ត្រាំ និងក្រុមមេដឹកនាំអាស៊ាន ដើម្បីបើកកិច្ចប្រជុំកំពូល នៅខែតុលាខាងមុខ។

គួរបញ្ជាក់ថា បើតាមទីក្រុងប៉េកាំង កិច្ចប្រជុំកំពូល SCO នឹងបិទបញ្ចប់ទៅ ជាមួយការចុះហត្ថលេខានិងចេញសេចក្តីប្រកាសរួម Tianjin។ កាលពីកិច្ចប្រជុំ SCO ឆ្នាំ២០២៤ នៅទីក្រុង Astana នៃប្រទេសកាហ្សាក់ស្ថាន ក្រុមមេដឹកនាំបានព្រមព្រៀងគ្នា បង្កើនកិច្ចសហប្រតិបត្តិការ ក្នុងផ្នែកប្រយុទ្ធប្រឆាំងភេរវកម្ម ថាមពលអាចកកើតឡើងវិញ និងសេដ្ឋកិច្ចឌីជីថល៕