(ប៉េកាំង)៖ ប្រធានាធិបតីចិន លោក ស៉ី ជីនពីង ទំនងជានឹងមិនទៅចូលរួមកិច្ចប្រជុំកំពូលអាស៊ាន ដែលគ្រោងប្រព្រឹត្តទៅក្នុងខែតុលា នៅឯប្រទេសម៉ាឡេស៉ីឡើយ។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters នាថ្ងៃសុក្រ ទី២២ ខែសីហា ឆ្នាំ២០២៥។

ក្នុងខែសីហានេះ នាយករដ្ឋមន្រ្តីម៉ាឡេស៉ី លោក Anwar Ibrahim ធ្លាប់បាននិយាយថា ទាំងលោក ស៉ី និងប្រធានាធិបតីអាមេរិក លោក ដូណាល់ ត្រាំ សុទ្ធតែត្រូវបានរំពឹងថានឹងមកចូលរួម កិច្ចប្រជុំកំពូលអាស៊ាន ដែលនឹងរៀបចំឡើងនៅទីក្រុងគូឡាឡាំពួ ពីថ្ងៃទី២៦ ដល់ថ្ងៃទី២៨ ខែតុលា។ ការអះអាងនោះ បាននាំឱ្យអ្នកវិភាគសន្និដ្ឋានថា លោក ត្រាំ និងលោក ស៉ី ដែលកំពុងស្ថិតក្នុងជម្លោះពាណិជ្ជកម្ម អាចនឹងជួបមុខគ្នាផ្ទាល់ជាលើកដំបូង គិតចាប់តាំងពីលោក ត្រាំ ត្រឡប់មកកាន់អំណាចជាថ្មី។

បើតាមប្រភពដែល Reuters ទទួលបាន នាយករដ្ឋមន្រ្តីចិន លោក Li Qiang ដែលបានចូលរួមកិច្ចប្រជុំកំពូលរវាងអាស៊ាន និងក្រុមប្រឹក្សាសហប្រតិបត្តិការឈូងសមុទ្រ កាលពីខែឧសភា ឆ្នាំនេះ ត្រូវបានរំពឹងថា ជាថ្មីម្តងទៀតនឹងតំណាងចិនចូលរួមក្នុង​កិច្ចប្រជុំនាខែតុលា។

ដោយឡែក កាលពីខែមុន លោក Anwar បានប្រាប់អង្គសភាម៉ាឡេស៉ីថា លោក ត្រាំ​ បានបញ្ជាក់ពីវត្តមានរបស់លោក ក្នុងកិច្ចប្រជុំខែតុលា អំឡុងកិច្ចសន្ទនាតាមទូរសព្ទ រវាងមេដឹកនាំទាំងពីរ។ កិច្ចប្រជុំកំពូលនោះ នឹងក្លាយជាលើកដំបូងបង្អស់ ដែលលោក ត្រាំ​ធ្វើដំណើរមកកាន់តំបន់អាស៉ីអាគ្នេយ៍ គិតចាប់ពីជំនួបទ្វេភាគីរបស់លោក តាំងតែពីឆ្នាំ២០១៩ ជាមួយមេដឹកនាំកូរ៉េខាងជើង លោក គីម ជុងអ៊ុន នៅទីក្រុងហាណូយនៃប្រទេសវៀតណាម។ លោក ត្រាំ ក៏ត្រូវបានរំពឹងថា នឹងចូលរួមកិច្ចប្រជុំ APEC នៅប្រទេសកូរ៉េខាងត្បូង ដែលនឹងរៀបចំឡើងពីថ្ងៃទី៣០ ខែតុលា ដល់ថ្ងៃទី១ ខែវិច្ឆិកា ផងដែរ។

គួរបញ្ជាក់ថា វាគឺជារឿងកម្រដែលប្រធានាធិបតីចិន ចូលរួមកិច្ចប្រជុំកំពូលអាស៊ាន ដោយគិតចាប់តាំងពីឡើងកាន់អំណាចកាលពី​ឆ្នាំ២០១២មក លោក ស៉ី ធ្លាប់ចូលរួមកិច្ចប្រជុំនេះ តែម្តងគត់កាលពីឆ្នាំ២០២១ ដែលជាកិច្ចប្រជុំពិសេស ហើយលោកចូលរួម​តាមប្រព័ន្ធអនឡាញថែមទៀត។ រីឯការចូលរួមវត្តមានរបស់ប្រធានាធិបតីអាមេរិក ក៏ជារឿងមិនញឹកញាប់ដូចគ្នា។ លោក ត្រាំ ធ្លាប់បានចូលរួមដោយផ្ទាល់ម្តង កាលពីឆ្នាំ២០១៧ ខណៈលោក ចូ បៃដិន បានចួលរួមពីចម្ងាយដូចលោក ស៉ី កាលពីឆ្នាំ២០២១។ យ៉ាងណាមិញ ក្នុងកិច្ចប្រជុំឆ្នាំ២០២២ លោក បៃដិន បានមកចូលរួមផ្ទាល់ នៅប្រទេសកម្ពុជា៕