(តៃប៉ិ)៖ មេដឹកនាំតៃវ៉ាន់ លោក Lai Ching-te បាននិយាយនៅថ្ងៃសុក្រ ទី២២ ខែសីហាថា លោកសង្ឃឹមថា ការចំណាយផ្នែកការពារជាតិ នឹងឈានដល់កម្រិត ៥ភាគរយនៃផលិផលក្នុងស្រុកសរុប (GDP) មុនឆ្នាំ ២០៣០។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters។

ក្នុងពេលចុះទៅពិនិត្យមូលដ្ឋានកងទ័ពជើងទឹក នៅឯឆ្នេរភាគភាគឦសានតៃវ៉ាន់ លោក Lai និយាយថា ការគំរាមកំហែងរបស់ចិន បានកើនឡើងក្នុងរយៈពេលប៉ុន្មានឆ្នាំថ្មីនេះ ហើយលោកសង្ឃឹមថា ការចំណាយផ្នែកការពារជាតិ នឹងទៅតាមស្តង់ដាររបស់ អង្គការណាតូ (NATO) គឺចំនួន ៥ភាគរយនៃ GDP មុនឆ្នាំ ២០២៣។

លោក Lai គូសបញ្ជាក់ថា «នេះមិនត្រឹមតែបង្ហាញពីការប្តេជ្ញាចិត្តរបស់តៃវ៉ាន់ ក្នុងការការពារសន្តិសុខជាតិ លទ្ធិប្រជាធិបតេយ្យ សេរីភាព និងសិទ្ធិមនុស្សប៉ុណ្ណោះទេ។ ប៉ុន្តែវាជាឆន្ទៈក្នុងការរួមគ្នា ជាមួយសហគមន៍អន្តរជាតិ ដើម្បីរារាំងការប្រើអំណាច និងរក្សាសន្តិភាព និងស្ថិរភាពក្នុងតំបន់ឥណ្ឌូប៉ាស៉ីហ្វិក»។

គួរបញ្ជាក់ថា គោលដៅចំណាយរហូតដល់ ៥ភាគរយនេះ គឺនឹងស្របតាមកម្រិតដែលសហរដ្ឋអាមេរិក ធ្លាប់ជំរុញ។ កាលពីថ្ងៃព្រហស្បតិ៍ រដ្ឋបាលតៃវ៉ាន់ បាននិយាយថា កញ្ចប់ថវិកាការពារជាតិឆ្នាំ២០២៦ នឹងមានកម្រិត ៣.៣២ភាគរយនៃ GDP រួម​បញ្ចូល​ទាំង​ការ​ចំណាយ​លើ​ឆ្មាំ​សមុទ្រជា​លើក​ដំបូង ​ក្នុង​ចំណោម​ក្រុមផ្សេង​ទៀត ដើម្បី​ឱ្យស្រប​នឹង​អ្វី​ដែល​នាយក​រដ្ឋមន្ត្រី លោក Cho Jung-tai បាន​និយាយ​ថា​ជាគំរូរបស់អង្គការ​ណាតូ៕