(កូឡុំបូ)៖ ប៉ូលិសនៅប្រទេសស្រីលង្កា បានឱ្យដឹងថា អតីតប្រធានាធិបតីលោក Ranil Wickremesinghe ត្រូវបានចាប់ខ្លួន នាថ្ងៃសុក្រ ទី២២ ខែសីហា ក្រោមការសង្ស័យប្រើប្រាស់ថវិការដ្ឋដោយមិនត្រឹមត្រូវ។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

លោក Wickremesinghe ត្រូវបានឃាត់ខ្លួន បន្ទាប់ពីត្រូវបានសួរនាំអំពីដំណើរទស្សនកិច្ចមួយ កាលពីខែកញ្ញា ឆ្នាំ២០២៣ ទៅកាន់ទីក្រុងឡុងដ៍ ដើម្បីចូលរួមពិធីមួយ សម្រាប់ភរិយារបស់លោក នៅឯសាកលវិទ្យាល័យចក្រភពអង់គ្លេសមួយកន្លែង អំឡុងពេលរូបលោកនៅកាន់តំណែងជាប្រមុខរដ្ឋ។ ប៉ូលិសស្រីលង្កាបានបន្ថែមថា ពួកគេគ្រោងចោទប្រកាន់រូបលោកជាផ្លូវការ ពីបទប្រើប្រាស់ធនធានរដ្ឋសម្រាប់គោលដៅផ្ទាល់ខ្លួន។

លោក Wickremesinghe បានឆ្លៀតចូលសំចតនៅទីក្រុងឡុងដ៍ កាលពីឆ្នាំ២០២៣ នៅតាមផ្លូវវិលត្រឡប់មកពីទីក្រុងហាឡាវ៉ាន់​នៃប្រទេសគុយបាវិញ ជាទីដែលរូបលោកបានធ្វើដំណើរទៅចូលរួម កិច្ចប្រជុំកំពូលក្រុមប្រទេស G77។ នៅទីក្រុងឡុងដ៍ លោកនិង​ភរិយាលោក គឺលោកស្រី Maithree បានចូលរួមពិធីមួយរបស់សាកលវិទ្យាល័យ Wolverhampton។

លោក Wickremesinghe ធ្លាប់អះអាងថា ការចំណាយសម្រាប់ការធ្វើដំណើររបស់ភរិយាលោក គឺត្រូវបានរ៉ាប់រងដោយលោកស្រី Maithree ផ្ទាល់ ពោលគឺពុំមានការប្រើប្រាស់លុយរដ្ឋទេ។ យ៉ាងណាមិញ នាយកដ្ឋានស៉ើបអង្កេតព្រហ្មទណ្ឌរបស់ប៉ូលិសស្រីលង្កា បានចោទថា លោក Wickremesinghe បានប្រើប្រាស់ថវិការដ្ឋាភិបាល ក្នុងការធ្វើដំណើរទស្សនកិច្ចលក្ខណៈឯកជនរបស់លោក ហើយអង្គរក្សរបស់លោក ក៏ត្រូវបានរ៉ាប់រងចំណាយដោយរដ្ឋផងដែរ។

គួរបញ្ជាក់ថា លោក Wickremesinghe បានក្លាយជាប្រធានាធិបតីស្រីលង្កា កាលពីខែកក្កដា ឆ្នាំ២០២២។ លោកត្រូវបាន​ទទួលស្គាល់ថា បានជួយស្តារស្ថិរភាពសេដ្ឋកិច្ចប្រទេសឡើងវិញ ក្រោយជួបវិបត្តិហិរញ្ញវត្ថុដ៏អាក្រក់បំផុត។ លោក Ranil Wickremesinghe បានទទួលបរាជ័យក្នុងការបោះឆ្នោតប្រធានាធិបតី កាលពីខែកញ្ញា ឆ្នាំ២០២៤៕