(រ៉ូម)៖ ទីភ្នាក់ងារជាច្រើនរបស់អង្គការសហប្រជាជាតិ បានប្រកាសជាផ្លូវការថា តំបន់ហ្កាហ្សាកំពុងធ្លាក់ចូលក្នុងគ្រោះអត់ឃ្លាន ដោយមានប្រជាជនជាងកន្លះលាននាក់កំពុងប្រឈមមុខនឹងការអត់ឃ្លានធ្ងន់ធ្ងរ និងការបាត់បង់ជីវិតដែលអាចទប់ស្កាត់បាន។ នេះបើយោងតាមរបាយការណ៍ចុងក្រោយបំផុតរបស់គណៈកម្មាធិការត្រួតពិនិត្យសន្តិសុខស្បៀង (IPC) ដែលបានចេញផ្សាយ ដោយទីភ្នាក់ងារសារព័ត៌មាន Xinhua។

ការវាយតម្លៃនេះ ដែលធ្វើឡើងដោយអង្គការ FAO, UNICEF, WFP, និង WHO បានបញ្ជាក់ថា គ្រោះអត់ឃ្លានដែលធ្លាប់ប្រមូលផ្តុំនៅភាគខាងជើង ឥឡូវនេះកំពុងរីករាលដាលទៅភាគខាងត្បូង ដល់តំបន់ Deir al-Balah និង Khan Younis។ របាយការណ៍បានព្យាករណ៍ថា ត្រឹមដំណាច់ខែកញ្ញាខាងមុខនេះ មនុស្សជាង ៦៤០,០០០នាក់ នឹងប្រឈមមុខនឹងអសន្តិសុខស្បៀងកម្រិតមហន្តរាយ។

របាយការណ៍បានគូសបញ្ជាក់ថា នេះគឺជាការប្រកាសគ្រោះអត់ឃ្លានជាផ្លូវការលើកដំបូងបង្អស់នៅមជ្ឈិមបូព៌ា ចាប់តាំងពីប្រព័ន្ធ IPC ត្រូវបានបង្កើតឡើង។ ទីភ្នាក់ងារ UN បានព្រមានថា ប្រតិបត្តិការយោធា និងការរឹតបន្តឹងជាបន្តបន្ទាប់លើការចូលទៅកាន់ជំនួយមនុស្សធម៌ អាចនឹងធ្វើឲ្យវិបត្តិនេះកាន់តែធ្ងន់ធ្ងរទៅទៀត។

គួរបញ្ជាក់ថា ស្ថានភាពកង្វះអាហារូបត្ថម្ភស្រួចស្រាវក្នុងចំណោមកុមារ បានឈានដល់កម្រិតខ្ពស់បំផុតមិនធ្លាប់មាន ដោយកុមារជាង ១២,០០០នាក់ត្រូវបានរកឃើញថា កង្វះអាហារូបត្ថម្ភធ្ងន់ធ្ងរត្រឹមតែក្នុងខែកក្កដាមួយប៉ុណ្ណោះ ដែលជាការកើនឡើង ៦ដងបើធៀបនឹងខែមករា។ ទីភ្នាក់ងារ UN បានអំពាវនាវឲ្យមានការឈប់បាញ់ជាបន្ទាន់ និងការឆ្លើយតបផ្នែកមនុស្សធម៌ទ្រង់ទ្រាយធំ ដើម្បីជួយសង្គ្រោះជីវិតប្រជាជនជាបន្ទាន់៕