(សេអ៊ូល)៖ នាថ្ងៃសៅរ៍ ទី២៣ ខែសីហា កូរ៉េខាងត្បូងបានឱ្យដឹងថា យោធារបស់ខ្លួនបានធ្វើការបាញ់ព្រមាន បន្ទាប់ទាហានកូរ៉េខាងជើង បានឆ្លងខ្សែបន្ទាត់ព្រំដែនមួយភ្លែត នៅក្នុងសប្តាហ៍នេះ។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

យោធាកូរ៉េខាងត្បូង បាននិយាយក្នុងសេចក្តីថ្លែងការណ៍ថា «កាលពីថ្ងៃអង្គារ ទី១៩ ខែសីហា ទាហានកូរ៉េខាងជើងមួយចំនួន ដែលធ្វើប្រតិបត្តិការក្បែរខ្សែបន្ទាត់ព្រំដែន នៅម្តុំចំណុចកណ្តាលនៃតំបន់ព្រំប្រទល់អន្តរកូរ៉េ DMZ ស្រាប់តែបានឆ្លងខ្សែបន្ទាត់ព្រំដែន ជាហេតុធ្វើឱ្យយោធារបស់យើង ត្រូវធ្វើការបាញ់ព្រមានឆ្លើយតប។ ភ្លាមៗក្រោយមក ទាហានកូរ៉េខាងជើងទាំងនោះ ក៏បានត្រឡប់ចូល​ទៅភាគខាងជើងខ្សែបន្ទាត់ព្រំដែនវិញ»។

នាថ្ងៃសៅរ៍ដដែលនេះ កូរ៉េខាងជើង តាមរយៈប្រព័ន្ធផ្សព្វផ្សាយរដ្ឋ KCNA ក៏បានសេចក្តីថ្លែងការណ៍ពាក់ព័ន្ធករណីខាងលើផងដែរ ដោយនិយាយថា ការបាញ់ព្រមានរបស់យោធាកូរ៉េខាងត្បូងនៅក្បែរព្រំដែន គឺជាសកម្មភាពបង្កហេតុដោយចេតនា។

គួរបញ្ជាក់ថា ចាប់តាំងពីឡើងកាន់អំណាចកាលពីខែមិថុនា ឆ្នាំនេះ ប្រធានាធិបតីកូរ៉េខាងត្បូង លោក Lee Jae Myung បានប្តេជ្ញាស្តារទំនាក់ទំនងឡើងវិញជាមួយកូរ៉េខាងជើង បន្ទាប់មកទល់នឹងពេលនេះ ទីក្រុងព្យុងយ៉ាងមិនបានបង្ហាញការស្វាគមន៍​នោះឡើយ ចំពោះកិច្ចប្រឹងប្រែងរបស់លោក Lee៕