(ម៉ានីល)​៖ រដ្ឋមន្រ្តីការពារជាតិហ្វីលីពីននិងអូស្រ្តាលី នាថ្ងៃសុក្រ ទី២៣ ខែសីហា បានឱ្យដឹងថា ប្រទេសទាំងពីរ កំពុងធ្វើការឆ្ពោះទៅរកកិច្ចព្រមព្រៀងការពារជាតិថ្មីមួយ ដើម្បីចុះហត្ថលេខាក្នុងឆ្នាំ២០២៦ ខណៈទីក្រុងម៉ានីលនិងកង់បេរ៉ា ព្យាយាមបង្កើនកិច្ចសហប្រតិបត្តិការយោធា ដើម្បីដោះស្រាយបញ្ហាប្រឈមរួមផ្នែកសន្តិសុខ នៅក្នុងតំបន់ឥណ្ឌូ-ប៉ាស៉ីហ្វិក។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។

រដ្ឋមន្រ្តីការពារជាតិហ្វីលីពីន លោក Gilberto Teodoro បាននិយាយថា កិច្ចព្រមព្រៀងពង្រឹងសហប្រតិបត្តិការការពារជាតិ នឹងជួយត្រួសត្រាយផ្លូវ សម្រាប់ការធ្វើសមយុទ្ធយោធារួមគ្នាកាន់តែញឹកញាប់ជាងមុន ដើម្បីបង្កើនសមត្ថភាពធ្វើប្រតិបត្តិការរួម​រវាងប្រទេសទាំងពីរ។ រីឯរដ្ឋមន្រ្តីការពារជាតិអូស្រ្តាលី លោក​ Richard Marles ដែលកំពុងស្ថិតក្នុងទីក្រុងម៉ានីល បាននិយាយថា កិច្ចព្រមព្រៀងថ្មីនោះ ក៏នឹងគាំទ្រផងដែរដល់ការអភិវឌ្ឍហេដ្ឋារចនាសម្ព័ន្ធការពារជាតិនៅហ្វីលីពីន ដោយមានផែនការសរុបចំនួន៥ ត្រូវបានគ្រោងនៅ៥ទីតាំង។

គួរបញ្ជាក់ថា ទំនាក់ទំនងរវាងហ្វីលីពីននិងអូស្រ្តាលី ត្រូវបានធ្វើឱ្យកាន់តែស៉ីជម្រៅ ស្របពេលដែលប្រទេសទាំងពីរ ព្យាយាមទប់ទល់​នូវអ្វីដែលពួកគេចាត់ទុកថា ជាការបង្កើនសកម្មភាពបង្កហេតុរបស់ចិន នៅតំបន់សមុទ្រចិនខាងត្បូង។ មុនទស្សនកិច្ចរបស់លោក Marles យោធាហ្វីលីពីនបានរាយការណ៍ពីកំណើនវត្តមាននាវាចិន នៅក្បែរតំបន់ថ្មប៉ប្រះទឹកមានវិវាទ Second Thomas Shoal នៃសមុទ្រចិនខាងត្បូង ស្របពេលគ្នាជាមួយការធ្វើសមយុទ្ធរវាងទីក្រុងម៉ានីលនិងទីក្រុងកង់បេរ៉ា។ សមយុទ្ធយោធា ALON ដែលមានរយៈពេល១៥ថ្ងៃ បានចាប់ផ្តើមកាលពីថ្ងៃទី១៥ ខែសីហា ហើយរួមមានទាំងការធ្វើសកម្មភាពល្បាតរួមគ្នា រវាងកងទ័ពជើងទឹកហ្វីលីពីន អូស្រ្តាលី និងកាណាដា នៅសមុទ្រចិនខាងត្បូង៕