(ការ៉ាកាស)៖ កាលពីថ្ងៃសុក្រ ទី២២ ខែសីហា ប្រធានាធិបតីវ៉េណេស៊ុយអេឡា លោក Nicolas Maduro បានចេញមុខថ្កោលទោស ការដាក់ពង្រាយនាវាចម្បាំងអាមេរិក៣គ្រឿង នៅក្បែរឆ្នេរនៃប្រទេសវ៉េណេស៊ុយអេឡា ដោយលោកបានហៅប្រតិបត្តិការនោះថា ជាការប៉ុនប៉ងខុសច្បាប់ដើម្បីផ្លាស់ប្តូររបបដឹកនាំ។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

ចាប់តាំងពីឡើងកាន់អំណាចសាជាថ្មីកាលពីដើមឆ្នាំនេះមក រដ្ឋបាលប្រធានាធិបតីអាមេរិក លោក ដូណាល់ ត្រាំ បានបង្កើនសម្ពាធជាខ្លាំង​ប្រឆាំងវ៉េណេស៊ុយអេឡា។ ក្នុងសប្តាហ៍នេះ ប្រភពពីសហរដ្ឋអាមេរិក បានបញ្ជាក់ថា នាវាចម្បាំងបំពាក់មីស៉ីលថ្នាក់ Aegis-class ៣គ្រឿង ត្រូវបានចល័តឆ្ពោះទៅកាន់ដែនទឹកអន្តរជាតិ ក្បែរប្រទេសអាមេរិកខាងត្បូងមួយនេះ។

ថ្លែងប្រាប់ក្រុមសមាជិកសភាវ៉េណេស៊ុយអេឡា លោក Maduro បាននិយាយដូច្នេះថា «អ្វីដែលពួកគេកំពុងគំរាមធ្វើប្រឆាំងនឹង​ប្រទេសវ៉េណេស៊ុយអេឡា នោះគឺការផ្លាស់ប្តូររបបដឹកនាំ ដែលជាទង្វើអសីលធម៌ និងជាឧក្រិដ្ឋកម្មខុសច្បាប់។ នេះគឺជាបញ្ហាមួយ​ពាក់ព័ន្ធសុខសន្តិភាពនិងច្បាប់អន្តរជាតិ សម្រាប់តំបន់អាមេរិកឡាទីននិងការីបង់។ អ្នកដែលហ៊ានប្រព្រឹត្តអំពើឈ្លានពាន ប្រឆាំង​ប្រទេសមួយនៅអាមេរិកឡាទីន គឺស្មើនឹងការវាយប្រហារលើប្រទេសទាំងអស់»។

បើតាមការអះអាងរបស់ទីក្រុងវ៉ាស៉ីនតោន ការដាក់ពង្រាយនាវាចម្បាំងខាងលើ គឺជាផ្នែកមួយនៃកិច្ចប្រឹងប្រែងទប់ស្កាត់សកម្មភាព​ជួញដូរគ្រឿងញៀនពីវ៉េណេស៊ុយអេឡា។ កាលពីឆ្នាំ២០២០ អំឡុងអាណត្តិទី១របស់លោក ត្រាំ លោក Maduro រួមជាមួយមន្រ្តីជាន់ខ្ពស់វ៉េណេស៊ុយអេឡាជាច្រើនរូបទៀត ត្រូវបានតុលាការសហព័ន្ធនៅសហរដ្ឋអាមេរិក ចោទប្រកាន់ជាផ្លូវការ​ពីបទល្មើសមួយចំនួន រួមមានទាំងការជាប់ពាក់ព័ន្ធក្នុងបណ្តាញភេរវកម្មគ្រឿងញៀន។

គួរបញ្ជាក់ថា ទីក្រុងវ៉ាស៉ីនតោនមិនបានទទួលស្គាល់ឡើយ ចំពោះជ័យជម្នះរបស់លោក Maduro ក្នុងការបោះឆ្នោត២លើក​ចុងក្រោយមកនេះ។ ក្នុងសប្តាហ៍នេះ លោក Maduro បាននិយាយថា រូបលោកនឹងដាក់ពង្រាយសមាជិកកងកម្លាំងប្រដាប់អាវុធ ប្រមាណ៤.៥លាននាក់ នៅទូទាំងប្រទេសវ៉េណេស៊ុយអេឡា ដើម្បីឆ្លើយតបការគំរាមកំហែងពីអាមេរិក ហើយថែមទាំងបានអំពាវនាវ​ឱ្យមានការប្រមូលផ្តុំធ្វើបាតុកម្ម ដើម្បីថ្កោលទោសទីក្រុងវ៉ាស៉ីនតោន៕