(វ៉ាស៊ីនតោន)៖ កាសែតអាមេរិក Wall Street Journal​ (WSJ) នៅថ្ងៃសៅរ៍ ទី២៣ ខែសីហា បានរាយការណ៍ថាមន្ទីរបញ្ចកោណបានរារាំងជាសម្ងាត់មិនឱ្យអ៊ុយក្រែនប្រើប្រាស់ មីស៊ីលរយ​ៈចម្ងាយឆ្ងាយ ATACMS ផលិតដោយសហរដ្ឋអាមេរិក ដើម្បីវាយប្រហារលើគោលដៅស្ថិតនៅជ្រៅក្នុងទឹកដីរុស្ស៉ី។

WSJ​ ផ្អែកលើប្រភពដែលខ្លួនទទួលបានពីក្រុមមន្ត្រីអាមេរិកក្នុងលក្ខខណ្ឌមិនបញ្ចេញឈ្មោះ បានឱ្យថាសហរដ្ឋអាមេរិកបានដាក់កំហិតលើទីក្រុងកៀវមិនឱ្យប្រើមីស៊ីល ATACMS វាយប្រហារលើគោលដៅយោធាស្ថិតនៅជ្រៅក្នុងទឹកដីអស់ជាច្រើនខែមកមកនេះ ហើយការសម្រេចចិត្តបែបនេះទៀតសោតទទួលបានការយល់ព្រមពីក្រុមមន្ត្រីជាន់ខ្ពស់នៃ មន្ទីរបញ្ចកោណ តែមិនត្រូវបានប្រកាសជាសាធារណៈឡើត។ តាម WSJ មានម្ដងនោះ អ៊ុយក្រែនបានស្នើសុំប្រើប្រាស់មីស៊ីល ATACMS ដើម្បីវាយប្រហារលើគោលដៅយោធា ស្ថិតនៅលើទឹកដីរុស្ស៉ី ប៉ុន្តែត្រូវបានបដិសេធ។

ក៏ប៉ុន្តែខាងសេតវិមាន និងមន្ទីរបញ្ចកោណមិនបានធ្វើអត្ថាធិប្បាយអ្វីជុំវិញសេចក្ដីរាយការណ៍របស់ WSJ នោះទេ។

គួរបញ្ជាក់ថា សេចក្ដីរាយការណ៍របស់ WSJ កើតមានឡើងចំពេលរដ្ឋបាលលោកប្រធានាធិបតីអាមេរិក ដូណាល់ ត្រាំ បាន និងកំពុងព្យាយាមរៀបចំឱ្យមានកិច្ចប្រជុំរវាងលោក ពូទីន និងលោក ហ្សេលេនស្គី។ តែនេះជារឿងដ៏ពិបាកមួយ។ ជាក់ស្ដែង រដ្ឋមន្ត្រីការបរទេសរុស្ស៉ី លោក Sergei Lavrov បានលើកឡើងក្នុងបទសម្ភាសន៍ជាមួយទូរទស្សន៍អាមេរិក NBC កាលពីថ្ងៃសុក្រកន្លងទៅនេះថាមិនទាន់មានផែនការ ឬរបៀបវារៈណាមួយសម្រាប់ការរៀបចំកិច្ចប្រជុំរវាងលោក ពូទីន និងលោក ហ្សេលេនស្គីនៅឡើយទេ៕