(​Reuters)៖ ប្រជាជនអូស្ត្រាលីរាប់ម៉ឺននាក់ បានចូលរួមក្នុងបាតុកម្មគាំទ្រប៉ាឡេស្ទីន នៅទូទាំងប្រទេស នៅថ្ងៃអាទិត្យ ទី២៤ ខែសីហា ខណ​ៈទំនាក់ទំនងរវាងអូស្ត្រាលី និងអ៉ីស្រាអែល កំពុងរកាំរកូសនឹងគ្នា ក្រោយរដ្ឋាភិបាលរបស់នាយករដ្ឋមន្ត្រីអូស្ត្រាលី លោក Anthony Albanese សម្រេចចិត្តថានឹងទទួលស្គាល់រដ្ឋប៉ាឡេស្ទីន។ នេះបើតាមក្រុមអ្នករៀបចំបាតុកម្ម ដកស្រង់ចេញផ្សាយដោយទីភ្នាក់ងារសារព័ត៌មាន Reuters។

អង្គការ Palestine Action Group បាន​ឱ្យដឹងថាបាតុកម្មបានធ្វើឡើង ៤០កន្លែង នៅទូទាំងប្រទេសអូស្ត្រាលីនៅថ្ងៃអាទិត្យនេះ តួយ៉ាងដូចជានៅក្នុងទីក្រុង Sydney, Brisbane និងទីក្រុង Melbourne។ អង្គការនេះដដែលបន្ថែមថាមនុស្សប្រហែល ៣៥០ ០០០នាក់ បានចូលរួមក្នុងបាតុកម្មគាំទ្រប៉ាឡេស្ទីននៅទូទាំងប្រទេស ក្នុងនោះរួមមាន ៥០ ០០០នាក់ ក្នុងទីក្រុង Brisbane។ ប៉ុន្តែខាងប៉ូលិសអូស្ត្រាលីបានអះអាងថាអ្នកចូលរួមបាតុកម្មក្នុងទីក្រុង Brisbane មានតែជាង ១០ ០០០នាក់ប៉ុណ្ណោះ និងមិនបានវាយតម្លៃពីចំនួនអ្នកចូលរួម បាតុកម្មក្នុងទីក្រុង Sydney និងទីក្រុង Melbourne នោះទេ។

គួរបញ្ជាក់ថា បាតុកម្មគាំទ្រប៉ាឡេស្ទីននៅអូស្ត្រាលី កើតមានឡើង ក្រោយនាយករដ្ឋមន្ត្រីអ៉ីស្រាអែល លោក Benjamin Netanyahu កាលពេលថ្មីៗនេះបានបង្កើនការវាយប្រហារ ពាក្យសម្ដីលើនាយករដ្ឋមន្ត្រីអូស្រ្តាលី លោក Anthony Albanese ពាក់ព័ន្ធនឹងការសម្រេចចិត្តរបស់រដ្ឋាភិបាលលោក Albanese ក្នុងខែសីហានេះថានឹងទទួលស្គាល់រដ្ឋប៉ាឡេស្ទីន នៅខែកញ្ញាខាងមុខ។ ក្រៅពីអូស្ត្រាលី បារាំង ចក្រភពអង់គ្លេស និងកាណាដា ក៏បានប្រកាសរៀងៗខ្លួនពីគម្រោងទទួលស្គាល់រដ្ឋប៉ាឡេស្ទីន នៅឯមហាសន្និបាត UN នៅខែក្រោយនេះ ផងដែរ៕