(កៀវ)៖ នាយករដ្ឋមន្ត្រីកាណាដា លោក Mark Carney បានធ្វើដំណើរទៅដល់ទីក្រុងកៀវ នៅថ្ងៃអាទិត្យ ទី២៤ ខែសីហា ដើម្បីចូលរួមក្នុងទិវាបុណ្យឯករាជ្យជាតិរបស់អ៊ុយក្រែន ខណៈមេដឹកនាំពិភពលោកកំពុងជំរុញការបិទបញ្ចប់សង្រ្គាមរវាងរុស្ស៉ី និងអ៊ុយក្រែន។ នេះបើតាមការចេញផ្សាយដោយទីភ្នាក់ងារសារព័ត៌មាន AFP។

ក្នុងការបង្ហោះមួយលើបណ្ដាញទំនាក់ទំនងសង្គម X លោក Mark Carney បានគូសបញ្ជាក់ដូច្នេះថា «នាឱកាសទិវាបុណ្យឯករាជ្យជាតិរបស់អ៊ុយក្រែន ហើយក្នុងខណៈពេលដ៏សំខាន់ បច្ចុប្បន្ននៅក្នុងប្រវត្តិសាស្ត្ររបស់អ៊ុយក្រែន កាណាដាកំពុងបង្កើនការគាំទ្រ និងកិច្ចប្រឹងប្រែងរបស់យើងឆ្ពោះទៅរកភាពយុត្តិធម៌ និងសន្តិភាពយូរអង្វែងសម្រាប់អ៊ុយក្រែន»។ តាមប្រព័ន្ធផ្សព្វផ្សាយកាណាដា CBC លោក Carney ទទួលបានការអញ្ជើញសម្រាប់ការបំពេញដំណើរទស្សន​កិច្ចទៅកាន់ទីក្រុងកៀវ ក្នុងនាមជាភ្ញៀវពិសេស ដើម្បីចូលទិវាបុណ្យឯករាជ្យជាតិរបស់អ៊ុយក្រែន។

លោក Carney ក៏បានសង្កត់ធ្ងន់ផងដែរពីការគាំទ្ររបស់កាណាដាចំពោះអ៊ុយក្រែន។ «ការគាំទ្ររបស់កាណាដាចំពោះអ៊ុយក្រែន គឺគ្មានការងាករេនោះទេ ហើយយើងកំពុងស្ថិតនៅ ជាមួយអ្នកគ្រប់ជំហាន ក្នុងការប្រយុទ្ធតស៊ូរបស់អ្នកដើម្បីការពារអធិបតេយ្យរបស់អ្នក និងឆ្ពោះទៅរកការសម្រេចក្ដីសុបិនសម្រាប់ប្រទេសរបស់អ្នក»។ នេះជាការបញ្ជាក់បន្ថែមរបស់លោក Carney។

គួរបញ្ជាក់ថា ដំណើរទស្សនកិច្ចរបស់លោក Carney ធ្វើឡើងចំពេលកងកម្លាំងរុស្ស៉ីនៅតែបន្តភាពរីកចម្រើនសន្សឹមៗ ក្នុងការវាយដណ្ដើមកាន់កាប់ទឹកដីអ៊ុយក្រែនក្នុងសង្រ្គាមជាង ៣ឆ្នាំ មកនេះ ដោយទីក្រុងមូស្គូកាលពីថ្ងៃសៅរ៍ម្សិលមិញ បានប្រកាសពីការដណ្ដើមកាន់កាប់ភូមិចំនួន២ ក្នុងតំបន់ Donetsk ភាគខាងកើតអ៊ុយក្រែន៕