(ហ្សេរុយសាឡឹម)៖ យន្តហោះ និងរថក្រោះអ៉ីស្រាអែល បានបន្តវាយប្រហារយ៉ាងខ្លាំងក្លាលើតំបន់ជាយក្រុងភាគខាងកើត និងខាងជើងនៃទីក្រុងហ្កាហ្សា កាលពីយប់រំលងអធ្រាត្រឈានចូលថ្ងៃអាទិត្យ ដោយបានបំផ្លាញអគារ និងផ្ទះសម្បែងជាច្រើនខ្នង។ ស្របពេលជាមួយគ្នានេះ មេដឹកនាំអ៉ីស្រាអែលបានប្តេជ្ញាថា នឹងជំរុញប្រតិបត្តិការវាយលុកទ្រង់ទ្រាយធំដែលបានគ្រោងទុកទៅមុខទៀត។ នេះបើយោងតាមការចេញផ្សាយ ដោយទីភ្នាក់ងារសារព័ត៌មាន Reuters។

យោងតាមសាក្សី សំឡេងផ្ទុះបានបន្លឺឡើងឥតឈប់ឈរនៅតំបន់ Zeitoun និង Shejaia ខណៈដែលរថក្រោះបានបាញ់ផ្លោងទៅលើផ្ទះសម្បែង និងផ្លូវថ្នល់នៅក្នុងសង្កាត់ Sabra ដែលនៅក្បែរនោះ ហើយអគារជាច្រើនខ្នងត្រូវបានបំផ្ទុះនៅទីប្រជុំជន Jabalia ភាគខាងជើង។ យោធាអ៉ីស្រាអែលបានបញ្ជាក់ថា ប្រតិបត្តិការនេះគឺដើម្បីរុះរើផ្លូវរូងក្រោមដី និងរារាំងក្រុមហាម៉ាសមិនឱ្យវិលត្រឡប់មកកាន់តំបន់ទាំងនេះវិញ។

គួរបញ្ជាក់ថា អ៉ីស្រាអែលបានអនុម័តផែនការមួយកាលពីដើមខែនេះ ដើម្បីដណ្តើមគ្រប់គ្រងទីក្រុងហ្កាហ្សា ដែលខ្លួនចាត់ទុកថាជា «បន្ទាយចុងក្រោយរបស់ក្រុមហាម៉ាស»។ រដ្ឋមន្ត្រីការពារជាតិ លោក Israel Katz បានប្តេជ្ញាជំរុញប្រតិបត្តិការនេះទៅមុខទៀត ហើយកាលពីថ្ងៃសុក្រ លោកបានព្រមានយ៉ាងច្បាស់ថា ទីក្រុងហ្កាហ្សានឹងត្រូវបាន «កម្ទេចចោលដល់ដី» ប្រសិនបើក្រុមហាម៉ាសមិនព្រមយល់ព្រមបញ្ចប់សង្គ្រាមតាមលក្ខខណ្ឌរបស់អ៉ីស្រាអែល និងដោះលែងចំណាប់ខ្មាំងទាំងអស់ទេនោះ។ ការវាយប្រហារដ៏ខ្លាំងក្លានេះ បានបង្កឱ្យមានការភ័យស្លន់ស្លោ និងជំរុញឱ្យគ្រួសារមួយចំនួនភៀសខ្លួនចេញពីទីក្រុង ខណៈដែលអ្នកផ្សេងទៀតបាននិយាយថា ពួកគេសុខចិត្តស្លាប់ ជាជាងចាកចេញពីផ្ទះសម្បែង៕