(កៀវ)៖ អ៊ុយក្រែន បានបើកការវាយប្រហារដោយដ្រូនជាច្រើនរលកមកលើប្រទេសរុស្ស៊ីនៅថ្ងៃអាទិត្យ ទី២៤ ខែសីហា ដោយបានបង្កឱ្យមានអគ្គិភ័យនៅរោងចក្រថាមពលនុយក្លេអ៊ែរមួយកន្លែង ខណៈដែលខ្លួនកំពុងប្រារព្ធទិវាឯករាជ្យជាតិ ចំពេលដែលក្តីសង្ឃឹមសម្រាប់កិច្ចចរចាសន្តិភាពកំពុងសាបសូន្យទៅវិញ។ នេះបើយោងតាមការចេញផ្សាយ ដោយទីភ្នាក់ងារសារព័ត៌មាន Reuters។

អាជ្ញាធររុស្ស៊ីបានបញ្ជាក់ថា ដ្រូនមួយគ្រឿងត្រូវបានបាញ់ទម្លាក់នៅលើរោងចក្រថាមពលនុយក្លេអ៊ែរ Kursk ភាគខាងលិចប្រទេសរុស្ស៊ី ប៉ុន្តែវាបានផ្ទុះឡើងនៅពេលធ្លាក់ដល់ដី និងបង្កជាអគ្គិភ័យ។ យោងតាមសេចក្តីថ្លែងការណ៍របស់រោងចក្រ អគ្គិភ័យត្រូវបានពន្លត់ ហើយមិនមានអ្នករងរបួស ឬការកើនឡើងកម្រិតវិទ្យុសកម្មនោះទេ។

ក្រៅពីនេះ ដ្រូនចំនួន ១០គ្រឿងផ្សេងទៀត ត្រូវបានបាញ់ទម្លាក់នៅតំបន់កំពង់ផែ Ust-Luga ក្បែរទីក្រុង Saint Petersburg ដែលបានបង្កជាអគ្គិភ័យនៅឃ្លាំងស្តុកប្រេងឥន្ធនៈមួយកន្លែង។ កងទ័ពអ៊ុយក្រែនដែលខ្វះខាតសព្វាវុធ បានពឹងផ្អែកយ៉ាងខ្លាំងលើដ្រូន ដើម្បីវាយប្រហារតបត ដោយផ្តោតជាពិសេសលើហេដ្ឋារចនាសម្ព័ន្ធប្រេងរបស់រុស្ស៊ី ដើម្បីកាត់ផ្តាច់ប្រភពចំណូលដែលទីក្រុងមូស្គូប្រើប្រាស់សម្រាប់ធ្វើសង្គ្រាម។

គួរបញ្ជាក់ថា ការវាយប្រហារនេះកើតឡើងបន្ទាប់ពីកិច្ចខិតខំប្រឹងប្រែងផ្នែកការទូតរបស់លោក ដូណាល់ ត្រាំ ក្នុងការរៀបចំជំនួបកំពូលរវាងលោក ពូទីន និងលោក ហ្សេលេនស្គី បានជាប់គាំង។ ស្របពេលជាមួយគ្នានេះ អ៊ុយក្រែនបានរាយការណ៍ថា រុស្ស៊ីក៏បានវាយប្រហារមកលើខ្លួនវិញកាលពីយប់មិញ ដោយប្រើប្រាស់មីស៊ីលបាលីស្ទិកមួយគ្រាប់ និងដ្រូន Shahed ចំនួន ៧២គ្រឿង ដែលក្នុងនោះការវាយប្រហារមួយបានសម្លាប់ស្ត្រីម្នាក់នៅតំបន់ Dnipropetrovskផងដែរ៕