(សេអ៊ូល)៖ ប្រធានគណៈប្រតិភូជាន់ខ្ពស់កូរ៉េខាងត្បូងម្នាក់ បាននិយាយក្នុងអំឡុងពេលទស្សនកិច្ចនៅទីក្រុងប៉េកាំង នៅថ្ងៃអាទិត្យនេះថា កូរ៉េខាងត្បូងសង្ឃឹមថា នឹងធ្វើឱ្យទំនាក់ទំនងជាមួយចិន ដែលបានធ្លាក់ក្នុងភាពតានតឹងក្នុងរយៈពេលប៉ុន្មានឆ្នាំចុងក្រោយនេះ វិលទៅរកភាពប្រក្រតីឡើងវិញ។ នេះបើយោងតាមការចេញផ្សាយ ដោយទីភ្នាក់ងារសារព័ត៌មាន Yonhap។

គណៈប្រតិភូនេះត្រូវបានបញ្ជូន ដោយប្រធានាធិបតីកូរ៉េខាងត្បូង លោក លី ចេម្យុង (Lee Jae Myung) ទៅកាន់ដៃគូពាណិជ្ជកម្មដ៏ធំបំផុតរបស់ខ្លួន ខណៈដែលរូបលោកផ្ទាល់កំពុងធ្វើដំណើរទៅកាន់ទីក្រុងវ៉ាស៊ីនតោន ដើម្បីជួបជាមួយប្រធានាធិបតីអាមេរិក លោក ដូណាល់ ត្រាំ។ ប្រធានគណៈប្រតិភូ ដែលជាអតីតប្រធានរដ្ឋសភា លោក Park Byeong-seug បានជួបជាមួយរដ្ឋមន្ត្រីការបរទេសចិន លោក វ៉ាង យី (Wang Yi) និងបានប្រគល់លិខិតមួយច្បាប់ពីលោក លី ជូនប្រធានាធិបតីចិន លោក ស៊ី ជីនពីង ផងដែរ។

ទីភ្នាក់ងារ Yonhap បានដកស្រង់សម្តីរបស់លោក Park ដែលបានប្រាប់លោក វ៉ាង យី ថា លោកសង្ឃឹមថាគណៈប្រតិភូនេះនឹង «បើកទ្វារឆ្ពោះទៅរកការធ្វើឱ្យទំនាក់ទំនងកូរ៉េខាងត្បូង-ចិនវិលទៅរកភាពប្រក្រតីឡើងវិញ»។

គួរបញ្ជាក់ថា ទំនាក់ទំនងការទូតរវាងប្រទេសទាំងពីរបានធ្លាក់ក្នុងភាពតានតឹង ចាប់តាំងពីមានជម្លោះក្នុងឆ្នាំ២០១៧ ជុំវិញការដាក់ពង្រាយប្រព័ន្ធការពារមីស៊ីលរបស់សហរដ្ឋអាមេរិក ដែលទីក្រុងប៉េកាំងបានប្រឆាំង។ ភាពតានតឹងបានកើនឡើងម្តងទៀតក្នុងឆ្នាំ២០២៣ ជុំវិញការអត្ថាធិប្បាយរិះគន់ទីក្រុងប៉េកាំងដោយអតីតប្រធានាធិបតីកូរ៉េខាងត្បូង លោក យូន ស៊ុកយ៉ុល (Yoon Suk Yeol)៕