(សាណា)៖ អ៉ីស្រាអែល បានបើកការវាយប្រហារតាមអាកាសទ្រង់ទ្រាយធំលើរដ្ឋធានី Sanaa របស់ប្រទេសយេម៉ែនកាលពីថ្ងៃអាទិត្យ ដោយបណ្តាលឱ្យមនុស្សយ៉ាងតិច២នាក់ស្លាប់ និង៥នាក់រងរបួស។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters។

យោធាអ៉ីស្រាអែលបាននិយាយថា គោលដៅនៃការវាយប្រហាររួមមាន បរិវេណវិមានប្រធានាធិបតី និងឃ្លាំងស្តុកប្រេងឥន្ធនៈ ដោយបញ្ជាក់ថា នេះជាការឆ្លើយតបនឹងការវាយប្រហារ «ម្តងហើយម្តងទៀត» របស់ក្រុមហ៊ូធី។ ការវាយប្រហារនេះកើតឡើង ក្រោយក្រុមហ៊ូធីបានបាញ់មីស៊ីលបាលីស្ទិកប្រភេទថ្មីមួយគ្រាប់ឆ្ពោះទៅកាន់អ៉ីស្រាអែលកាលពីថ្ងៃសុក្រ។

គួរបញ្ជាក់ថា ការវាយប្រហារទៅវិញទៅមករវាងអ៉ីស្រាអែល និងក្រុមហ៊ូធី បានក្លាយជារឿងធម្មតានៅក្នុងតំបន់ ចាប់តាំងពីសង្គ្រាមនៅតំបន់ហ្កាហ្សាបានចាប់ផ្តើម។ មន្ត្រីជាន់ខ្ពស់ហ៊ូធីម្នាក់បានប្តេជ្ញាថា ក្រុមហ៊ូធីនឹងបន្តសកម្មភាពរបស់ខ្លួន ដោយបញ្ជាក់ថា «យើងនឹងមិនបោះបង់ចោលបងប្អូនរបស់យើងនៅហ្កាហ្សានោះទេ ទោះបីជាត្រូវលះបង់អ្វីក៏ដោយ»៕