(វ៉ាស៊ីនតោន)៖ អនុប្រធានាធិបតីអាមេរិក លោក JD Vance បានប្រកាសថា រុស្ស៊ីបានចាប់ផ្តើមធ្វើ «សម្បទានធំៗ» ហើយ ដែលជាវឌ្ឍនភាពដ៏សំខាន់មួយក្នុងការត្រួសត្រាយផ្លូវឆ្ពោះទៅរកកិច្ចព្រមព្រៀងសន្តិភាពជាមួយអ៊ុយក្រែន បើទោះបីជាមិនទាន់មានការវិវត្តច្បាស់លាស់ឆ្ពោះទៅរកការបញ្ចប់ជម្លោះក៏ដោយ។ នេះបើយោងតាមការចេញផ្សាយ ដោយទីភ្នាក់ងារសារព័ត៌មាន Reuters។

ថ្លែងនៅក្នុងកម្មវិធី «Meet the Press» របស់ទូរទស្សន៍ NBC កាលពីថ្ងៃអាទិត្យ លោក Vance បានគូសបញ្ជាក់ពីសម្បទានសំខាន់ៗចំនួនពីរដែលរុស្ស៊ីបានធ្វើឡើងជាលើកដំបូង បន្ទាប់ពីកិច្ចខិតខំប្រឹងប្រែងផ្នែកការទូតរបស់លោកប្រធានាធិបតី ត្រាំ៖
ទី១. ពួកគេបានទទួលស្គាល់ថា ពួកគេនឹងមិនអាចតម្លើងរបបអាយ៉ងមួយនៅទីក្រុងកៀវបានឡើយ ដែលនេះគឺជាការបោះបង់ចោលគោលដៅដើមដ៏ធំបំផុតរបស់ខ្លួន។
ទី២. ពួកគេបានទទួលស្គាល់ថា នឹងត្រូវមានការធានាសន្តិសុខមួយចំនួនសម្រាប់បូរណភាពទឹកដីរបស់អ៊ុយក្រែន។

គួរបញ្ជាក់ថា ការអត្ថាធិប្បាយរបស់លោក Vance នេះ ធ្វើឡើងស្របពេលដែលប្រធានាធិបតី ដូណាល់ ត្រាំ បានព្រមានជាថ្មីថា នឹងដាក់ទណ្ឌកម្មលើរុស្ស៊ី ប្រសិនបើមិនមានវឌ្ឍនភាពឆ្ពោះទៅរកសន្តិភាពក្នុងរយៈពេលពីរសប្តាហ៍ខាងមុខ។ លោក Vance បានពន្យល់ថា ទណ្ឌកម្មគឺជាឧបករណ៍នៃឥទ្ធិពលសេដ្ឋកិច្ច ដោយលោកបានលើកយកការដំឡើងពន្ធ ២៥% លើទំនិញឥណ្ឌា ជាឧទាហរណ៍៕