(កៀវ)៖ ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី កាលពីថ្ងៃអាទិត្យ ទី២៤ ខែសីហា បានទទូចថាកិច្ចចរចាជាមួយលោកប្រធានាធិបតីរុស្ស៉ី វ្ល៉ាឌីមៀ ពូទីន នៅតែជាមធ្យោបាយឆ្ពោះទៅមុខដ៏មានប្រសិទ្ធភាពបំផុត ខណៈកិច្ចប្រឹងប្រែងស្វែងរកសន្តិភាពបិទបញ្ចប់សង្រ្គាមនៅអ៊ុយក្រែននៅតែស្ថិតក្នុងភាពស្រពេចស្រពិល។ នេះបើតាមការចេញផ្សាយដោយទីភ្នាក់ងារសារព័ត៌មាន AFP។

នៅបន្ទាប់ពីការជំរុញដោយប្រធានាធិបតីអាមេរិក លោក ដូណាល់ ត្រាំ ដើម្បីត្រួសត្រាយផ្លូវឆ្ពោះទៅរកការរៀបចំកិច្ចប្រជុំកំពូលអ៊ុយក្រែន-រុស្ស៉ី មកទល់នឹងពេលនេះ ក្ដីសង្ឃឹមចំពោះ សន្តិភាពហាក់ប្រែជាស្រអាប់ នៅពេលរុស្ស៉ីកាលពីថ្ងៃសុក្រ ទី២២ ខែសីហា បានច្រានចោលលទ្ធភាពនៃការរៀបចំកិច្ចប្រជុំកំពូលភ្លាមៗរវាងលោក ហ្សេលេនស្គី និងលោក ពូទីន។

តែយ៉ាងណាក៏ដោយ លោក ហ្សេលេនស្គី នៅតែទទូចថាកិច្ចប្រជុំកំពូលរវាងមេដឹកនាំ និងមេដឹកនាំ គឺជាមធ្យោបាយឆ្ពោះទៅមុខប្រកបដោយប្រសិទ្ធភាពបំផុត ជាមួយការអំពាវនាវជាថ្មី ឱ្យមានកិច្ចប្រជុំកំពូលទ្វេភាគីជាមួយលោក ពូទីន។ ថ្លែងនៅឯពិធីមួយនាឱកាសទិវាបុណ្យឯករាជ្យជាតិអ៊ុយក្រែនកាលពីថ្ងៃអាទិត្យ ដោយមានការចូលរួមពីមេដឹកនាំ និងមន្ត្រីលោកខាងលិច ក្នុងនោះរួមមានបេសកជនពិសេសអាមេរិក លោក Keith Kellogg លោក ហ្សេលេនស្គីក៏បានប្ដេជ្ញាផងដែរថានឹងជំរុញឱ្យរុស្ស៉ីទទួលយកសន្តិភាព។

គួរបញ្ជាក់ថា ក្នុងថ្ងៃតែមួយនោះដែរ អ៊ុយក្រែន និងរុស្ស៉ី បាននិយាយថាពួកគេបានដោះដូរឈ្លើយសឹក និងជនស៊ីវិលគ្នាទៅវិញទៅមកម្ខាង ១៤៦នាក់ ដែលនេះជាការដោះដូរឈ្លើយសឹក លើកចុងក្រោយបំផុតមួយរវាងភាគីសង្រ្គាមទាំង២៕