(កៀវ)៖ នាយករដ្ឋមន្ត្រីកាណាដា លោក Mark Carney បានប្រាប់ប្រធានាធិបតីអ៊ុយក្រែន លោក Volodymyr Zelenskiy កាលពីថ្ងៃអាទិត្យ ទី២៤ ខែសីហាថារូបលោកគាំទ្រការអំពាវនាវចង់បានការធានាសន្តិសុខដ៏រឹងមាំរបស់អ៊ុយក្រែន ជាផ្នែកមួយនៃកិច្ចព្រមព្រៀងសន្តិភាព ដោយនិយាយថាកាណាដា នឹងមិនច្រាលចោលលទ្ធភាពបញ្ជូនកងទ័ពឱ្យចូលរួមក្នុងបេសកកម្មរក្សាសន្តិភាពនោះឡើយ។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

លោក Mark Carney ធ្វើការកត់សម្គាល់បែបនេះ នាឱកាសបំពេញដំណើរទស្សនកិច្ចជាលើកដំបូងរបស់លោកទៅកាន់អ៊ុយក្រែន ចាប់តាំងពីឡើងកាន់ តំណែងជានាយករដ្ឋមន្ត្រីកាណាដាកាលពីខែមីនាមក តបតាមការអញ្ជើញចូលរួមជាមួយលោក ហ្សេលេនស្គីនៅឯពិធីមួយនៃទិវាបុណ្យឯករាជ្យជាតិរបស់ អ៊ុយក្រែន។ លោក Carney បានលើកឡើងថា «យើងកំពុងប្រឹងប្រែងដើម្បីធានាឱ្យបានថាសង្រ្គាមនេះនឹងបិទបញ្ចប់ទៅជាមួយការធានាសន្តិភាពសម្រាប់ អ៊ុយក្រែន ដែលមានន័យថាគ្មានសង្រ្គាម ឬក៏ការគំរាមកំហែងនៃសង្រ្គាមបន្សល់ទុកឱ្យកូនចៅរបស់យើងនោះទេ»។

គួរបញ្ជាក់ថា លោក ហ្សេលេនស្គី ទទូចចង់បានការធានាសន្តិសុខមួយនៅពេលអនាគត ជាផ្នែកមួយនៃកិច្ចព្រមព្រៀងសន្តិភាពណាមួយជាមួយរុស្ស៉ី ដូចគ្នា ទៅនឹងមាត្រា៥ របស់បក្សសម្ព័ន្ធយោធា NATO ដែលចែងថាការវាយប្រហារលើសមាជិកណាមួយនឹងត្រូវបានចាត់ទុកជាការវាយប្រហារលើបក្សសម្ព័ន្ធ យោធានេះទាំងមូល៕