(កៀវ)៖ កាលពីថ្ងៃអាទិត្យចុងសប្តាហ៍កន្លងទៅ រុស្ស៉ីអះអាងថា កងកម្លាំងរបស់ខ្លួនចាប់យកបានទីតាំងថ្មីមួយទៀតនៅក្នុងតំបន់ Dnipropetrovsk របស់អ៊ុយក្រែន ខណៈដែលអ៊ុយក្រែនអះអាងថា កងទ័ពរបស់ខ្លួនដណ្តើមបានភូមិចំនួន ៣នៅភាគខាងកើតនៃតំបន់ Donetsk មកវិញ។ នេះបេីយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃចន្ទ ទី២៥ ខែសីហា ឆ្នាំ ២០២៥។

ក្រោយបរាជ័យក្នុងការឈានទៅមុខលើរដ្ឋធានីកៀវរបស់អ៊ុយក្រែន នៅដើមដំបូងនៃសង្រ្គាមឈ្លានពាននាខែកុម្ភៈ ឆ្នាំ ២០២២ កងទ័ពរុស្ស៉ីបានងាកទៅផ្តោតលើតំបន់ Donbas ភាគខាងកើត ដោយប្រកាសពីការដណ្តើមយកភូមិថ្មីៗស្ទើរតែរាល់ថ្ងៃ។

តាមក្រសួងការពារជាតិរុស្ស៉ី ភូមិដែលខ្លួនចាប់យកបានគឺមានឈ្មោះ Filia ស្ថិតនៅក្នុងតំបន់ Dnipropetrovsk និងជាទីតាំងថ្មីមិនមែនក្នុងចំណោមទីតាំងទាំង ៤ដែលបានកាត់បញ្ចូលក្រោយសង្រ្គាមផ្ទុះឡេីងនោះទេ។ មូស្គូនិយាយទៀតថា ខ្លួនកំពុងធ្វើផ្លូវចូលទៅក្នុងតំបន់ Dnipropetrovsk ប៉ុន្តែកងកម្លាំងអ៊ុយក្រែនបាននិងកំពុងវាយបកដើម្បីយកភូមិនានានៅក្នុងតំបន់ Donetsk ដែលជាចំណុចបង្គោលនៃការឈានទៅមុខរបស់រុស្ស៉ី និងដេីម្បីរារាំងសកម្មភាពរុលចូលទៅក្នុង Dnipropetrovsk។

មេបញ្ជាការកំពូលមួយរូបរបស់អ៊ុយក្រែន លោក Oleksandr Syrskyi បាននិយាយថា កងកម្លាំងទីក្រុងកៀវ បានដណ្តើមយកភូមិ Mykhailivka, Zelenyi Hai និង Volodymyrivka មកវិញ។ ភូមិ Zelenyi Hai ស្ថិតនៅជាប់តំបន់ Dnipropetrovsk ខណៈដែលភូមិចំនួនពីរផ្សេងទៀតគឺនៅជិតទីក្រុង Pokrovsk ដែលជាចំណុចផ្តោតនៃការប្រយុទ្ធគ្នាយ៉ាងធ្ងន់ធ្ងរអស់រយៈពេលជាច្រើនខែ។ Reuters មិនអាចផ្ទៀងផ្ទាត់ពណ៌មានពីសមរភូមិបានដោយឯករាជ្យនោះទេ៕