(អូស្លូ)៖ កាលពីថ្ងៃអាទិត្យ ទី២៤ ខែសីហា រដ្ឋាភិបាលនៃប្រទេសន័រវែស បានប្រកាសថា ខ្លួននឹងចូលរួមផ្តល់ប្រព័ន្ធការពារដែនអាកាស គិតជាទឹកប្រាក់ប្រហែល ៧ពាន់លានក្រោនន័រវែស ឬស្មើនឹង៦៩៦លានដុល្លារអាមេរិក ដល់អ៊ុយក្រែន។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។

នាយករដ្ឋមន្រ្តីន័រវែស លោក Jonas Gahr Store បាននិយាយក្នុងសេចក្តីថ្លែងការណ៍យ៉ាងដូច្នេះថា «រួមគ្នាជាមួយអាល្លឺម៉ង់ នាពេលនេះពួកយើងកំពុងធានាថា អ៊ុយក្រែនទទួលប្រព័ន្ធការពារដែនអាកាសខ្លាំងៗ។ អាល្លឺម៉ង់និងន័រវែស កំពុងធ្វើការជាមួយគ្នាយ៉ាងជិតស្និទ្ធ ដើម្បីគាំទ្រអ៊ុយក្រែន ក្នុងកិច្ចប្រឹងប្រែងប្រយុទ្ធតស៊ូការពារជាតិ និងការពារអាយុជីវិតជនស៉ីវិល ប្រឆាំងនឹងការវាយប្រហារតាមផ្លូវអាកាសរបស់រុស្ស៉ី»។

គួរបញ្ជាក់ថា ន័រវែសនិងអាល្លឺម៉ង់ កំពុងផ្តល់មូលនិធិសម្រាប់ការផ្គត់ផ្គង់ប្រព័ន្ធមីស៉ីលការពារដែនអាកាស Patriot ចំនួន២គ្រឿង ឱ្យអ៊ុយក្រែន។ បន្ថែមពីនេះ ន័រវែសកំពុងចូលរួមចំណែកក្នុងការទិញរ៉ាដាការពារដែនអាកាស ពីក្រុមហ៊ុនអាល្លឺម៉ង់ Hensoldt និងប្រព័ន្ធការពារដែនអាកាសពីក្រុមហ៊ុនន័រវែសផ្ទាល់ Kongsberg៕