(មូស្គូ)៖ ក្រសួងការពារជាតិរុស្ស៉ី និងប្រធានាធិបតីអ៊ុយក្រែន បានឱ្យដឹងថា កាលពីថ្ងៃអាទិត្យ ទី២៤ ខែសីហា ប្រទេសទាំងពីរ បានដោះដូរឈ្លើយសឹកសរុប២៩២នាក់ ពោលគឺម្ខាង១៤៦នាក់ ក្រោយការជួយសម្រុះសម្រួលដោយប្រទេសអេមីរ៉ាតអារ៉ាប់រួម។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។

ក្រសួងការពារជាតិរុស្ស៉ី បាននិយាយថា ជនជាតិរុស្ស៉ីទាំងអស់ ដែលត្រូវបានដោះលែងមកវិញ កំពុងស្ថិតនៅប្រទេសបេឡារុស ដើម្បីទទួលការពិនិត្យសុខភាពទាំងផ្លូវកាយនិងផ្លូវចិត្ត។ ក្នុងចំណោមនោះ អ៊ុយក្រែនក៏បានប្រគល់ពលរដ្ឋរុស្ស៉ី៨នាក់ ដែលជាអ្នកស្រុក​នៅតំបន់ Kursk ផងដែរ។

ទន្ទឹមគ្នា ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី បានបង្ហោះសារលើបណ្តាញ Telegram ថា ការដោះដូរ​ឈ្លើយសឹកជាមួយរុស្ស៉ី ត្រូវបានធ្វើឡើង ប៉ុន្តែលោកមិនបានផ្តល់តួលេខទេ ដោយគ្រាន់ត្រឹមថា ភាគច្រើននៃជនទាំងនោះ គឺបានជាប់ឃុំ​តាំងពីឆ្នាំ២០២២ ហើយក៏មានអ្នកកាសែតម្នាក់ ដែលត្រូវបានចាប់ខ្លួនជាឈ្លើយសឹក មួយខែក្រោយការឈ្លានពានរបស់រុស្ស៉ី។

គួរបញ្ជាក់ថា លោក ហ្សេលេនស្គី បានអរគុណអេមីរ៉ាតអារ៉ាប់រួម សម្រាប់តួនាទីក្នុងការជួយត្រួតពិនិត្យដំណើរការដោះដូរអ្នកទោសនេះ។ ក្រោយមក យោធាអ៊ុយក្រែន បានចេញសេចក្តីថ្លែងការណ៍ទទួលស្គាល់ថា ឈ្លើយសឹកម្ខាងៗចំនួន១៤៦នាក់ ត្រូវបានដោះដូរគ្នា៕