(កៀវ)៖ នៅថ្ងៃចន្ទ ទី២៥ ខែសីហា រដ្ឋមន្រ្តីហិរញ្ញវត្ថុអាល្លឺម៉ង់ លោក Lars Klingbeil ដែលជាឧបនាយករដ្ឋមន្រ្តីផងដែរនោះ បាននិយាយនៅពេលទៅដល់រដ្ឋធានីកៀវរបស់អ៊ុយក្រែនថា ប្រធានាធិបតីរុស្ស៉ីលោក វ៉្លាឌីមៀ ពូទីន គួរតែដឹងឱ្យច្បាស់ថា ការគាំទ្ររបស់អាល្លឺម៉ង់ចំពោះអ៊ុយក្រែន គឺគ្មានការថយចុះឡើយ។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។

លោក Klingbeil បានធ្វើដំណើរទៅដល់ទីក្រុងកៀវ ក្នុងទស្សនកិច្ចមួយ ដែលមិនត្រូវបានប្រកាសឱ្យដឹងជាមុន។ លោកគឺជាមេដឹកនាំ​នៃគណបក្ស SDP ដែលជាដៃគូនៅក្នុងចង្កោមរដ្ឋាភិបាល របស់អធិការបតីអាល្លឺម៉ង់ លោក Friedrich Merz។ លោក Klingbeil បានលើកឡើងយ៉ាងដូច្នេះថា «លោក ពូទីន មិនគួរស្រមើស្រមៃឡើយថា ការគាំទ្ររបស់អាល្លឺម៉ង់សម្រាប់អ៊ុយក្រែន អាចដួលរលំនោះ។ ផ្ទុយទៅវិញ យើងនៅតែបន្តជាអ្នកគាំទ្រធំជាងគេទី២របស់អ៊ុយក្រែន នៅលើពិភពលោក និងធំបំផុតនៅអឺរ៉ុប។ អ៊ុយក្រែនអាចបន្តពឹងផ្អែកលើអាល្លឺម៉ង់ជានិច្ច»។

គួរបញ្ជាក់ថា បើតាមលោករដ្ឋមន្រ្តីហិរញ្ញវត្ថុអាល្លឺម៉ង់ រដ្ឋាភិបាលទីក្រុងបែរឡាំង បានគាំទ្រអ៊ុយក្រែនគិតជាទឹកប្រាក់សរុបចំនួន ៥០.៥ពាន់លានអឺរ៉ូ ឬស្មើនឹងជិត៦០ពាន់លានដុល្លារអាមេរិកហើយ ចាប់តាំងតែពីសង្រ្គាមផ្ទុះឡើងកាលពីកុម្ភៈ ឆ្នាំ២០២២។ ជាចុងក្រោយ លោក Klingbeil ក៏បានទទូចផងដែរឱ្យលោក ពូទីន បង្ហាញចំណាប់អារម្មណ៍ដោយស្មោះ ក្នុងដំណើរការស្វែងរក​សន្តិភាព សម្រាប់សង្រ្គាមឈ្លានពានដែលខ្លួនបង្កឡើង និងដែលបានក្លាយជាសង្រ្គាមដ៏ប្រល័យបំផុតនៅអឺរ៉ុប គិតចាប់តាំងពីសង្រ្គាមលោកលើកទី២៕