(ហ្សាការតា)៖ នៅថ្ងៃចន្ទ ទី២៥ ខែសីហា ឥណ្ឌូណេស៉ី សហរដ្ឋអាមេរិក ព្រមទាំងសម្ព័ន្ធមិត្ត១១ប្រទេសផ្សេងទៀត បានរួមគ្នាបើកសមយុទ្ធយោធា ដែលនឹងមានរយៈពេលជាងមួយសប្តាហ៍ ក្នុងគោលដៅពង្រឹងការធានាស្ថិរភាពក្នុងតំបន់អាស៉ី-ប៉ាស៉ីហ្វិក។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

សមយុទ្ធប្រចាំឆ្នាំហៅថា Super Garuda Shield នឹងប្រព្រឹត្តទៅនៅរដ្ឋធានីហ្សាការតា ព្រមទាំងនៅទីតាំងមួយចំនួន លើកោះ Sumatra និងទីប្រជុំកោះ Riau រហូតដល់ថ្ងៃទី៤ ខែកញ្ញា។ កងទ័ពឥណ្ឌូណេស៉ីចំនួនជាង៤១០០នាក់ និងកងទ័ពអាមេរិកជាង១៣០០នាក់ នឹងចូលរួមក្នុងសមយុទ្ធនេះ ហើយក៏នឹងវត្តមានកងទ័ពមកពីប្រទេសដទៃទៀត ដូចជាអូស្រ្តាលី ជប៉ុន សិង្ហបុរី បារាំង នូវែលសេឡង់ ចក្រភពអង់គ្លេស ជាដើមផងដែរ។

អាមេរិកនិងសម្ព័ន្ធមិត្តមួយចំនួនដូចជាអូស្រ្តាលី ធ្លាប់បានបង្ហាញការកើនឡើងក្តីបារម្ភ អំពីការបង្កើនសកម្មភាពរបស់ចិននៅប៉ាស៉ីហ្វិក ប៉ុន្តែទន្ទឹមគ្នាទីក្រុងវ៉ាស៉ីនតោន ធ្លាប់បានអះអាងថា សមយុទ្ធយោធារួមបែបនេះ មិនមានគោលដៅលើទីក្រុងប៉េកាំង ឬលើប្រទេសទី៣ណាមួយឡើយ។ បើតាមមេបញ្ជាការនៃបញ្ជាការដ្ឋានយោធាអាមេរិកប្រចាំឥណ្ឌូ-ប៉ាស៉ីហ្វិក សមយុទ្ធយោធា Super Garuda Shield ឆ្នាំនេះ នឹងជាសមយុទ្ធធំបំផុតមិនធ្លាប់មាន។

គួរបញ្ជាក់ថា ឥណ្ឌូណេស៉ីជាផ្លូវការ ប្រកាន់គោលនយោបាយការបរទេសមួយ ដែលអព្យាក្រឹត ហើយព្យាយាមរក្សាទំនាក់ទំនងល្អ​ទាំងជាមួយទីក្រុងវ៉ាស៉ីនតោន និងជាមួយទីក្រុងប៉េកាំង ពោលគឺដើរលើគន្លងខ្សែការទូតមួយ នៅចន្លោះការប្រកួតប្រជែងឥទ្ធិពលរវាង​កំពូលមហាអំណាចទាំងពីរ៕