(ហ៊្សេរុយសាឡិម)៖ ការិយាល័យនាយករដ្ឋមន្ត្រីអ៉ីស្រាអែល លោក Benjamin Netanyahu បានឱ្យដឹងនៅក្នុងសេចក្តីថ្លែងការណ៍នាថ្ងៃចន្ទ ទី២៥ ខែសីហាថា អ៉ីស្រាអែលត្រៀមខ្លួនជាស្រេចដើម្បីជួយដល់លីបង់ ក្នុងការដកហូតអាវុធក្រុម Hezbollah។ នេះបេីយោងតាមការចេញផ្សាយដោយទីភ្នាក់ងារសារព័ត៌មាន Reuters។

កាលពីដើមខែនេះ គណៈរដ្ឋមន្ត្រីលីបង់បានអនុម័តលើសំណេីនៃផែនការរបស់សហរដ្ឋអាមេរិក ក្នុងការរំសាយអាវុធក្រុម Hezbollah។ មេដឹកនាំ Hezbollah បានច្រានចោលការអំពាវនាវឱ្យក្រុមរបស់ខ្លួនរំសាយអាវុធ ហើយបានគំរាមកំហែងពីសង្រ្គាមថ្មីមួយជាមួយអ៉ីស្រាអែល ប្រសិនបើហ៊ានបេីកការឈ្លានពានទ្រង់ទ្រាយធំណាមួយ ប្រឆាំងនឹងលីបង់។

គួរបញ្ជាក់ថា Hezbollah ជាក្រុមប្រដាប់អាវុធមួយនៅមជ្ឈិមបូព៌ាដែលមានសម្ព័ន្ធភាពជាមួយអ៉ីរ៉ង់។ បន្ទាប់ពីការ ប្រយុទ្ធគ្នានៅភាគខាងត្បូងលីបង់ អ៉ីស្រាអែល និងក្រុម Hezbollah បានឈានដល់បទឈប់បាញ់មួយ កាលពីខែវិច្ឆិកា ឆ្នាំ ២០២៤៕